AVROPA ŞURASI İLƏ AVROPA İTTİFAQI ARASINDA ƏMƏKDAŞLIQ BARƏDƏ RAZILIQ SƏNƏDİ İMZALANMIŞDIR
AZƏRTAC-ın xüsusi müxbiri xəbər verir ki, iyunun 18-də Strasburqda Avropa Şurası və Avropa İttifaqının Fundamental Hüquqlar Agentliyi əməkdaşlıq barədə razılıq sənədini imzalamışlar. Yeni sənəd Avropada insan hüquqlarının müdafiəsi sahəsində faydasız fəaliyyətlərdən və problemə ikili yanaşma sistemindən qaçmağa, birgə fəaliyyətə şərait yaradır.
Sənədi Avropa Şurasının baş katibi Terri Devis və Avropa İttifaqı adından Sloveniyanın Avropa məsələləri üzrə dövlət katibi Yanej Lenarçiç imzalamışlar. Bu razılaşma insan hüquqlarının müdafiəsi ilə bağlı Avropa sisteminin quruculuğu yolunda mühüm addım hesab edilir və insan hüquqlarının inkişafı sahəsində birgə fəaliyyət imkanlarını genişləndirir.
Avropa Şurası insan hüquqları sahəsində yeni standartlar üzərində işini davam etdirməklə bərabər, quruma üzv olan 47 ölkədə və Avropa Birliyinin əhatə etdiyi 27 dövlətdə bu məsələni diqqət mərkəzində saxlayacaqdır.
Xatırladaq ki, əsas iqamətgahı Vyanada yerləşən Avropa İttifaqının Fundamental Hüquqlar Agentliyi hüquq müdafiəsi aspektləri ilə bağlı işini qurumun qanunvericiliyi tələblərinə uyğun təşkil edir, onun üzv ölkələr və birliyin təsisatları tərəfindən həyata keçirilməsinə çalışır.
Bölmənin digər xəbərləri
