AZƏRBAYCAN-FRANSA PARLAMENTLƏRARASI ƏLAQƏLƏRİ GENİŞLƏNİR
AZƏRTAC xəbər verir ki, Fransa Milli Assambleyasının Fransa-Azərbaycan dostluq qrupunun üzvləri ölkəmizdə səfərdədirlər.
Qonaqlar iyunun 17-də Fəxri xiyabanda ümummilli lider Heydər Əliyevin məzarını və Şəhidlər xiyabanını ziyarət etmişlər.
Milli Məclisin mətbuat xidmətindən bildirmişlər ki, Milli Məclisdə Fransa Milli Assambleyasının Fransa-Azərbaycan dostluq qrupunun üzvləri ilə görüş keçirilmişdir.
Milli Məclisin Azərbaycan-Fransa parlamentlərarası əlaqələr üzrə işçi qrupunun rəhbəri Gülər Əhmədova qonaqları salamlayaraq bildirmişdir ki, müstəqil Azərbaycan Fransa ilə əlaqələrin inkişafına böyük əhəmiyyət verir. Parlamentlər səviyyəsində münasibətlərimizin dərinləşməsi dövlətlərarası əlaqələrə də öz müsbət təsirini göstərir. Hər iki ölkənin nümayəndə heyətləri beynəlxalq təşkilatlarda tez-tez görüşür, maraq doğuran məsələlər ətrafında fikir mübadiləsi aparırlar.
Gülər Əhmədova işçi qrupunun Jorj Sand tərəfindən fransız dilinə tərcümə olunmuş “Koroğlu” eposunu əldə etdiyini və onun Azərbaycanda nəşri ilə məşğul olduğunu bildirmişdir.
Qeyd olunmuşdur ki, azərbaycanlı oxucular Fransa ədəbiyyatına böyük maraq göstərirlər.
Görüşdə Fransa-Azərbaycan dostluq qrupunun sədri Jan-Lui Dümon ölkəmizə səfərindən və burada keçirdiyi görüşlərdən məmnun olduğunu bildirmişdir.
Qeyd edilmişdir ki, qrupun üzvləri əvvəllər də bir neçə dəfə Azərbaycanda olmuş, burada keçirilən beynəlxalq tədbirlərdə iştirak etmişlər. Fransalı deputatlar Azərbaycandakı inkişafı yüksək dəyərləndirərək ölkələrinin Azərbaycanla iqtisadi, mədəni və digər sahələrdə əməkdaşlığa böyük önəm verdiyini vurğulamışlar.
Görüşdə Azərbaycan parlamentinin 90 illiyi ilə əlaqədar yubiley tədbirləri və digər məsələlər ətrafında fikir mübadiləsi aparılmışdır.
Bölmənin digər xəbərləri
