AZƏRBAYCAN HƏLƏ UZUN İLLƏR HEYDƏR ƏLİYEVİN RƏHBƏRLİYİ İLƏ ÖZ YÜKSƏLİŞ YOLUNU DAVAM ETDİRƏCƏKDİR
AZƏRTAC-A DAXİL OLMUŞ BƏYANATDA BELƏ DEYİLİR
Ölkəmizdə prezident seçkiləri ərəfəsində əhali arasında keçirilən müxtəlif sorğular, aparılan analitik təhlillər ölkəmizin başçısı möhtərəm Heydər Əlirza oğlu Əliyevin bu seçkilərdə şəksiz qələbəsindən xəbər verir. Tarix göstərir ki, bu dahi şəxsiyyətin müdrik rəhbərliyi ilə doğma Azərbaycanımız hələ uzun illər öz yüksəliş yolunu davam etdirəcək, yeni-yeni uğurlar, müvəffəqiyyətlər qazanacaqdır. Bütün bu reallıqlar isə dövlətimizə, millətimizə düşmən kəsilmiş bəzi müxalif qüvvələri təbii ki, ciddi narahat edir. İstər ölkəmizin daxilində, istərsə də xaricində fəaliyyət göstərən bu qüvvələr seçkiqabağı dövrdə respublikamızdakı mövcud siyasi sabitliyi pozmaq, seçkiləri əngəlləmək üçün dəridən-qabıqdan çıxırlar. Öz çirkin niyyətlərini həyata keçirmək üçün onlar hər cür yalan, böhtan və iftira söyləməkdən utanmır, təhqirə, şantaja belə əl atmaqdan çəkinmirlər.
Bu cür qərəzli, məkrli kampaniyada prezidentliyə namizədliyi irəli sürülmüş İsa Qənbərin təsisçisi olduğu “Yeni Müsavat” qəzeti daha çox canfəşanlıq edir. Bu qəzet qardaş Türkiyənin Gülhanə Hərbi Tibb Akademiyasında müayinədən keçən möhtərəm Prezidentimizin səhhəti haqqında yalan fərziyyələrə söykənən yanlış məlumatlar yayır, heç bir əxlaqi və etik normalara sığmayan qərəzli, təhqiramiz yazılar dərc etdirir. Xalqımız Vətənimizi fəlakətlərdən qurtaran, doğma Azərbaycanımızın müstəqilliyini əbədi, sarsılmaz və dönməz edən dahi bir şəxsiyyətə, müdrik el ağsaqqalına qarşı üzdəniraq bir qəzetin göstərdiyi bu cür məkrli, qərəzli münasibəti elə bütövlükdə özünə, öz dövlətçiliyinə qarşı yönəlmiş şərəfsiz bir addım kimi qiymətləndirir. Bütün bu çirkin, bəd əməllərə haqlı olaraq nifrət və hiddətini bildirən xalqımız böhtan və şər kampaniyasına Türkiyədə bədnam ”Star” televiziya kanalının və qəzetinin də qoşulmasını təəssüf hissi ilə pisləyir. Bu telekanalın ölkəmizin başçısının səhhəti, onun müayinəsi barədə heç bir mənbəyə əsaslanmadan yanlış, qeyri-obyektiv və ən nəhayət isə qərəzli məlumatlar yaymasını, həmin kanalın vəzifəli şəxslərinin respublikamızın konsulunun timsalında millətimizi, Orta Asiyada yaşayan xalqları təhqir etməsini qardaş dövlətlərimiz arasındakı sarsılmaz dostluq əlaqələrinin üzərinə kölgə salmaq, Azərbaycanın daxili işlərinə qarışmaq cəhdləri kimi qiymətləndiririk.
Biz, Siyasi Partiyaların Məşvərət Məclisinə daxil olan bütün partiyalar “Yeni Müsavat” qəzetinin möhtərəm Prezidentimizə qarşı yönəlmiş məkrli, qərəzli əməllərini qətiyyətlə pisləyir, onun bütün kollektivindən bu çirkin, bəd hərəkətlərə son qoymağı, ölkəmizin qanunlarına, xalqımızın adət-ənənələrinə hörmətlə yanaşmağı tələb edirik. Biz eyni zamanda efirində Azərbaycan Respublikasının başçısı haqqında yanlış, qərəzli məlumatlar yaymış, ölkəmizin, millətimizin, Orta Asiyada yaşayan xalqların ünvanına həqarətli ifadələr söyləməklə bütün Türk dünyasını təhqir etmiş “Star” televiziyasından təcili olaraq xalqımızdan üzr istəməsini tələb edir, qardaş Türkiyənin rəsmi dairələrinin həmin kanal haqqında müvafiq tədbirlər görəcəyinə və dost, qardaş ölkədə bir daha bu cür hallara yol verilməyəcəyinə ümid etdiyimizi bildiririk.
Bölmənin digər xəbərləri
