AZƏRBAYCAN İLƏ ABŞ ARASINDA TƏHSİL SAHƏSİNDƏ ƏMƏKDAŞLIĞA DAİR SAZİŞ İMZALANMIŞDIR
AZƏRTAC xəbər verir ki, iyunun 19-da Təhsil Nazirliyində Azərbaycan ilə Amerika Birləşmiş Ştatları (ABŞ) arasında təhsil sahəsində əməkdaşlığa dair rəsmi saziş imzalanmışdır.
İmzalanma mərasimində təhsil naziri Misir Mərdanov çıxış edərək Azərbaycan ilə Amerika Birləşmiş Ştatlarının təhsil sahəsində əlaqələrindən danışmış, ölkəmiz öz müstəqilliyini əldə etdikdən sonra müxtəlif proqramlar çərçivəsində 4 mindən artıq azərbaycanlı gəncin ABŞ-da təhsil aldığını bildirmişdir.
Respublikamızın Prezidenti İlham Əliyevin müvafiq Sərəncamı ilə təsdiq edilmiş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın əhəmiyyətini qeyd edən nazir, eyni zamanda, Azərbaycan ilə Amerika Birləşmiş Ştatları arasında təhsil sahəsində əməkdaşlığa dair imzalanacaq sazişin bu sahədə əlaqələrin daha da genişlənməsinə, daha çox sayda azərbaycanlı gəncin ABŞ-ın nüfuzlu universitetlərində təhsil almasına imkan yaradacağını söyləmişdir.
Ölkələrimiz arasında təhsil sahəsində əməkdaşlığın əhəmiyyətini vurğulayan Amerika Birləşmiş Ştatları dövlət katibinin təhsil və mədəniyyət məsələləri üzrə köməkçisi xanım Qoli Ameri ABŞ-ın təhsillə bağlı müxtəlif proqramları, o cümlədən Fubbrayt proqramı çərçivəsində həyata keçirilən tədbirləri və qazanılan nailiyyətləri diqqətə çatdırmışdır.
O, Azərbaycan Prezidenti İlham Əliyevin müvafiq Sərəncamı ilə təsdiq edilmiş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində çoxlu sayda azərbaycanlı gəncin ABŞ-ın universitetlərində təhsil alacağına əmin olduğunu bildirmişdir.
Sonra Azərbaycan ilə ABŞ arasında təhsil sahəsində əməkdaşlığa dair saziş imzalanmışdır.
Sənədi M.Mərdanov və xanım Q.Ameri imzalamışlar.
İmzalanma mərasimində ABŞ-ın Azərbaycandakı səfiri Ann Ders iştirak etmişdir.
######
Bölmənin digər xəbərləri
