AZƏRBAYCAN İLƏ AVSTRİYA ARASINDA ENERJİ SAHƏSİNDƏ YARANMIŞ TƏRƏFDAŞLIQ YÜKSƏK QİYMƏTLƏNDİRİLMİŞDİR
Azərbaycan Respublikası Xarici İşlər Nazirliyinin mətbuat xidmətindən AZƏRTAC-a bildirmişlər ki, iyunun 18-də nazir Elmar Məmmədyarov Avstriya parlamentinin Cənubi Qafqaz və Orta Asiya parlamentlərarası dostluq qrupunun sədri Karl Öllinqerin başçılıq etdiyi nümayəndə heyəti ilə görüşmüşdür.
Azərbaycan Parlamentinin yaranmasının 90 illik yubileyi tədbirlərində iştirak etmək məqsədi ilə ölkəmizə səfərə gəlmiş nümayəndə heyətini salamlayan nazir, Avstriya və Azərbaycan arasında siyasi əlaqələrin inkişafını, enerji sahəsindəki tərəfdaşlığı yüksək qiymətləndirmiş, Bakıda Avstriya səfirliyinin açılmasının ikitərəfli əməkdaşlığa böyük töhfə verəcəyini bildirmişdir.
Avstriya nümayəndə heyətinin rəhbəri ölkəsinin iqtisadiyyat və ticarət sahəsində əlaqələri genişləndirmək marağında olduğunu söyləyərək, dövlətlərimiz arasında iqtisadi tərəfdaşlığın genişlənməsinin Bakıda Avstriya səfirliyinin açılması perspektivlərini də artıracağına inandığını bildirmişdir. Qonaq Cənubi Qafqazda mövcud münaqişələrin regional təklükəsizlik, inkişaf və əməkdaşlığa təhdid və maneə olduğunu vurğulayaraq Ermənistan-Azərbaycan, Dağlıq Qarabağ münaqişəsinin nizamlanması imkanları ilə maraqlanmışdır.
Nazir E.Məmmədyarov Ermənistanın yürütdüyü təcavüzkar siyasəti öz müqəddəratını təyinetmə hüququ ilə pərdələməsinin yolverilməzliyini, beynəlxalq hüquqa və Avropa dəyərlərinə zidd olduğunu bildirərək, yalnız Azərbaycanın ərazi bütövlüyünün bərpa edilməsindən sonra regionun davamlı sabit inkişafı üçün birgə əməkdaşlığın mümkünlüyünü diqqətə çatdırmışdır. Azərbaycanın etibarlı qonşuluq münasibətlərində maraqlı olduğunu bildirən E.Məmmədyarov, beynəlxalq ictimaiyyətin, xüsusilə Avropa institutlarının münaqişənin həllində və Ermənistan tərəfini təcavüzkar siyasətdən əl çəkməyə inandırmaqda böyük rol oynaya biləcəyini qeyd etmişdir.
Görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.
Bölmənin digər xəbərləri
