AZƏRBAYCAN İLƏ PAKİSTAN ARASINDA ƏLAQƏLƏRİ GENİŞLƏNDİRMƏK ÜÇÜN BÖYÜK POTENSİAL VARDIR
Xarici İşlər Nazirliyinin mətbuat xidmətindən AZƏRTAC-a bildirmişlər ki, iyunun 20-də nazir Elmar Məmmədyarov Pakistan parlamentinin sədri Muhammadmian Sumro ilə görüşmüşdür.
Pakistan rəsmisi Azərbaycan parlamentinin 90 illiyi münasibətilə naziri təbrik etmiş və Bakıya səfərindən məmnun qaldığını bildirmişdir. Qonaq, həmçinin Pakistan və Azərbaycan arasında son illərdə əlaqələrin dinamik inkişafını və qarşılıqlı səfərlərin artmasını təqdirəlayiq hesab etmişdir.
Nazir E.Məmmədyarov ikitərəfli siyasi əlaqələrin yüksək səviyyəsini, mövcud qarşılıqlı anlaşmanı müsbət qiymətləndirmiş, iqtisadi, humanitar və digər sahələrdə əlaqələri gücləndirmək üçün geniş potensialın olduğunu vurğulamışdır.
Görüşdə, həmçinin dövlətlərimiz arasında birbaşa hava xəttinin açılması, iş adamlarının səfərlərinin təşkili, maliyyə və bank sahələrində əlaqələrin inkişafı məsələləri müzakirə olunmuşdur.
Bölmənin digər xəbərləri
