AZƏRBAYCAN JURNALİSTLƏRİNİN V QURULTAYINA HAZIRLIQ İŞLƏRİ BAŞA ÇATMIŞDIR
AZƏRTAC xəbər verir ki, Azərbaycan jurnalistlərinin V qurultayının keçirilməsi üzrə Təşkilat Komitəsinin iyunun 18-də sonuncu iclası olmuşdur.
Təşkilat Komitəsinin sədri Əflatun Amaşov məlumat vermişdir ki, ilkin seçki mərhələsində Mətbuat Şurasının təsisçisi olan 155 KİV-dən 138-nə məktub və gizli səsvermə bülletenləri çatdırılmışdır. 17 təsisçinin Şura ilə əlaqələri itdiyindən onlara məktub və bülleten çatdırmaq mümkün olmamışdır. 128 təsisçi qurultayda iştirakını təsdiqləmişdir.
Müxtəlif KİV-lərdən 123 jurnalist, 132 ictimaiyyət nümayəndəsi İdarə Heyətinə namizəd kimi göstərilmişdir. Onlardan ən çox səs toplayanlarının adlarının ölkə jurnalistlərinin V qurultayının səsvermə bülletenlərinə daxil edilməsi məqsədəuyğun hesab olunmuşdur.
İclasda işçi qrupunun təqdimatı Təşkilat Komitəsinin üzvləri tərəfindən müzakirə olunaraq təsdiqlənmişdir.
Təşkilat Komitəsinin iclasında qurultayın iş planının layihəsi ətrafında da müzakirələr aparılmış və təsdiq olunmuşdur.
Qurultayda şura sədrinin, Nəzarət-Təftiş Komissiyasının (NTK) hesabatı dinləniləcək, Mətbuat Şurasının Nizamnaməsinə əlavə və dəyişikliklərin edilməsi, İdarə Heyətinin və NTK-nın yeni tərkibinin və MŞ sədrinin seçilməsi məsələlərinə baxılacaq, qurultayın yekun sənədləri qəbul olunacaqdır.
Bölmənin digər xəbərləri
