İDMAN
Azərbaycan klubu şahmat üzrə Avropa Kuboku yarışlarının beşinci turunda qələbə qazanmışdır
Bakı, 16 oktyabr (AZƏRTAC). İsrailin Eylat şəhərində şahmat üzrə Avropa klubları Kuboku yarışlarının beşinci turu keçirilmişdir.
AZƏRTAC xəbər verir ki, “SOCAR-Azerbaijan” komandası bu turda Çexiyanın “Novı Bor” klubuna 3,5:2,5 hesabı ilə qalib gəlmişdir.
Beşinci turun yekunları: Teymur Rəcəbov (2792) - Radoslav Voytaşek (2733) - heç-heçə, Şəhriyar Məmmədyarov (2748) - David Navara (2722) - heç-heçə, Veselin Topalov (2751) - Viktor Lazniçka (2678) -1:0, Aleksandr Qrişşuk (2752) - Krişnan Sasikiran (2680) - heç-heçə, Qata Kamski (2755) - Mateuş Bartel (2635) -1:0, Emil Sutovski (2685) - Zbinek Xraçek (2612) - 0:1.
Azərbaycan klubunun aktivində 8 xal vardır. “Tomsk-400”, “Aşdod”, “Ekonomist-SQSEU Saratov” və “Yuqra” komandaları da eyni miqdarda xal toplamışlar. 10 xal toplayan “Sankt-Peterburq Şahmat Federasiyası” komandası turnirin yeganə lideridir. Altıncı turda “SOCAR-Azerbaijan” klubunun rəqibi bu komanda olacaqdır.