Hindistanda keçirilən seçkilərdə 642 milyon nəfər iştirak edib
Bakı, 3 iyun, AZƏRTAC
Hindistanda keçirilən parlament seçkilərində 642 milyon nəfər səs verib ki, bu da parlament seçkiləri üzrə dünya rekordudur.
AZƏRTAC xəbər verir ki, bu barədə Hindistan Seçki Komissiyasının rəhbəri Raciv Kumar bildirib.
“Hindistanda parlamentin aşağı palatasına seçkilərdə 642 milyon seçici, o cümlədən 312 milyon qadın səs verib və bu, dünya rekordudur”, - deyə Raciv Kumar qeyd edib. Onun sözlərinə görə, dünyanın ən böyük seçki kampaniyasına MSK-nın 15 milyon əməkdaşı cəlb olunub.
Mərkəzi Seçki Komissiyasının rəhbəri, həmçinin bildirib ki, seçkilərdə “Böyük yeddilik” ölkələri ilə müqayisədə 1,5 dəfə, Avropa İttifaqının 27 ölkəsi ilə müqayisədə isə 2,5 dəfə çox insan səs verib.
Hindistanda seçkilər aprelin 19-dan iyunun 1-dək yeddi mərhələdə davam edib. Mübarizə parlamentin aşağı palatasındakı 543 yer uğrunda gedib. İlkin nəticələr Hindistan Xalq Partiyasının rəhbərlik etdiyi Milli Demokratik Alyansın (NDA) hakimiyyətdə qalacağını göstərir. Beləliklə, Narendra Modi ölkənin ilk Baş naziri Cəvahirləl Nehrunun rekordunu təkrarlayaraq, ardıcıl üçüncü müddətə hökumətə başçılıq edə bilər.
Səsvermənin nəticələri iyunun 4-də rəsmən elan olunacaq. Hazırda Hindistanda rəsmi qeydə alınmış 968 milyon seçici var.
Bölmənin digər xəbərləri
