Vətən Müharibəsi Qəhrəmanı: Şuşada qazanılan strateji üstünlük suverenliyimizin tam bərpasına aparan yolu açdı
Bakı, 20 sentyabr, AZƏRTAC
2020-ci ilin 44 günlük Vətən müharibəsində Azərbaycan Ordusunun qazandığı tarixi Zəfər yalnız ərazilərimizin işğaldan azad edilməsi ilə məhdudlaşmadı. Həmin müharibədə əldə olunan hərbi-strateji üstünlük sonrakı proseslərin, o cümlədən 2023-cü ilin 19–20 sentyabrında həyata keçirilən lokal xarakterli antiterror tədbirlərinin uğurla başa çatmasının əsasını qoydu.
Bu fikirləri AZƏRTAC-a açıqlaması zamanı Vətən Müharibəsi Qəhrəmanı polkovnik-leytenant Zaur Hüseynov bildirib.
Onun sözlərinə görə, Vətən müharibəsində Azərbaycan Ordusu döyüş meydanında təşəbbüsü ilk günlərdən öz əlinə aldı.
“Füzuli, Cəbrayıl, Zəngilan və Qubadlı istiqamətlərində əldə etdiyimiz uğurlar nəticəsində düşmənin illərlə qurduğu müdafiə sistemini mərhələli şəkildə dağıtdıq. Ordumuz hər gün irəliləyir, yeni mövqelərə çıxır, qarşı tərəfi həm taktiki, həm də mənəvi-psixoloji baxımdan geri çəkilməyə məcbur edirdi. Ancaq bütün bu əməliyyatların zirvəsi, sözsüz ki, Şuşanın azad olunması oldu. Şuşa bizim üçün təkcə hərbi-strateji mövqe deyildi. Şuşa Azərbaycan xalqının milli yaddaşı, mədəniyyəti, qüruru və mənəvi kimliyidir. Buna görə də Şuşa uğrunda döyüş həm hərbi, həm də mənəvi baxımdan Vətən müharibəsinin ən mühüm mərhələlərindən biri idi. Eyni zamanda, Şuşanın coğrafi mövqeyi ona müstəsna strateji əhəmiyyət verirdi. Şəhərə nəzarətin əldə olunması Xankəndi istiqamətində müdafiə sisteminə ciddi təsir göstərdi, Qarabağdakı erməni hərbi qüvvələrinin Ermənistanla əsas kommunikasiya və təminat imkanlarını kəskin şəkildə məhdudlaşdırdı. Şuşanın azad edilməsindən sonra qarşı tərəf artıq döyüşün taleyinin dəyişdiyini anlayırdı. Noyabrın 10-da imzalanmış Üçtərəfli Bəyanat da məhz döyüş meydanında yaranmış yeni reallığın nəticəsi idi”, - deyə polkovnik-leytenant vurğulayıb.
Zaur Hüseynovun sözlərinə görə, Vətən müharibəsində Xüsusi Təyinatlı Qüvvələrin fəaliyyəti ayrıca qeyd edilməlidir: "Xüsusi Təyinatlı Qüvvələr ən mürəkkəb ərazilərdə, ən çətin tapşırıqların icrasında yüksək döyüş hazırlığı, çeviklik və peşəkarlıq nümayiş etdirdi. Dağlıq və meşəlik ərazilərdə, düşmənin gözləmədiyi istiqamətlərdən həyata keçirilən əməliyyatlar qarşı tərəfdə ciddi psixoloji təsir yaratmışdı. Döyüş meydanında bəzən silahın yaratdığı təsirdən daha güclü olan bir amil var – qarşı tərəfin sənin haradan və nə zaman gələcəyini bilməməsi. Xüsusi təyinatlılarımız məhz bu üstünlüyü yaratmışdılar. Artıq Azərbaycan xüsusi təyinatlısının adı qarşı tərəf üçün böyük psixoloji təzyiq amilinə çevrilmişdi".
Vətən Müharibəsi Qəhrəmanı bildirib ki, 2020-ci ildən sonra Azərbaycan əldə etdiyi hərbi üstünlüklə kifayətlənmədi, Silahlı Qüvvələrin döyüş qabiliyyətinin artırılması istiqamətində sistemli iş davam etdirildi.
“2020-ci ilin Zəfəri son nöqtə kimi qəbul edilmədi. Azərbaycan dövləti yaranmış yeni hərbi-siyasi reallığı düzgün qiymətləndirərək Ordunun gücləndirilməsini davam etdirdi. 2023-cü ilin sentyabrında yaranmış vəziyyət Azərbaycan dövlətinin öz ərazisində konstitusiya quruluşunu və suverenliyini tam təmin etməsini zəruri etmişdi. 19 sentyabr 2023-cü ildə başlanan lokal xarakterli antiterror tədbirləri cəmi 23 saat 43 dəqiqə davam etdi. Bunun nəticəsində Azərbaycan Respublikasının dövlət suverenliyi bütün ərazidə tam bərpa edildi. Mən bu əməliyyata yalnız 19–20 sentyabrda baş vermiş ayrıca hərbi hadisə kimi baxmıram. Bu, 44 günlük Vətən müharibəsində qazandığımız hərbi üstünlüyün, sonrakı illərdə dövlətimizin həyata keçirdiyi ardıcıl siyasətin və Azərbaycan Ordusunun daha da gücləndirilməsinin məntiqi nəticəsi idi. 2020-ci ildə Azərbaycan döyüş meydanında öz gücünü göstərdi, 2023-cü ilin sentyabrında isə bu güc dövlət suverenliyinin bütün ölkə ərazisində bərqərar olunması ilə tamamlandı. Rəsmi sənədlərdə də əməliyyatın qarşıya qoyulmuş vəzifələrin yerinə yetirilməsi və dövlət suverenliyinin tam bərpası ilə nəticələndiyi qeyd olunur. Bu baxımdan 8 Noyabr – Zəfər Günü ilə 20 Sentyabr – Dövlət Suverenliyi Günü tariximizin bir-birini tamamlayan iki mühüm mərhələsidir. Bu gün Azərbaycan öz ərazisinin hər bir nöqtəsində öz dövlət iradəsini həyata keçirən, sərhədlərinə nəzarət edən, güclü Silahlı Qüvvələrə malik olan suveren dövlətdir. Həmin nəticənin arxasında illərlə aparılan dövlət quruculuğu, siyasi iradə, xalq-ordu birliyi, Azərbaycan əsgər və zabitinin qəhrəmanlığı dayanır.
Əlbəttə, bu tarixi günləri qeyd edərkən şəhidlərimizin əziz xatirəsini unuda bilmərik. Qazandığımız Zəfərin və bu gün sahib olduğumuz suverenliyin ən böyük mənəvi yükü onların fədakarlığı ilə bağlıdır. Lakin onların uğrunda can verdiyi Azərbaycan bu gün daha güclü, daha qüdrətli və öz taleyinin sahibi olan dövlətdir. Biz döyüş meydanında ərazi bütövlüyümüzü bərpa etdik, o cümlədən dövlət iradəmizlə suverenliyimiz tam təmin olundu”
Müxbir - Göyçək Mahmudlu
Bölmənin digər xəbərləri
