Şahin Bayramov: Dövlət Suverenliyi Günü Azərbaycanın müasir tarixinin mühüm səhifəsidir
Xankəndi, 20 sentyabr, AZƏRTAC
20 Sentyabr – Dövlət Suverenliyi Günü Azərbaycanın müasir tarixinin ən mühüm və qürurverici səhifələrindən biridir. Bu tarix dövlətimizin ərazi bütövlüyünün və suverenliyinin tam bərpasını ifadə etməklə yanaşı, milli iradəmizin, dövlətçilik ənənələrimizin və müstəqil inkişaf yolumuzun təntənəsini təcəssüm etdirir. Eyni zamanda, 20 Sentyabr bizə suverenliyin yalnız əldə olunan tarixi nailiyyət deyil, daim qorunmalı, möhkəmləndirilməli və gələcək nəsillərə daha güclü şəkildə ötürülməli fundamental dövlətçilik dəyəri olduğunu xatırladır.
Bu fikirlər Qarabağ Universitetinin rektoru Şahin Bayramovun Dövlət Suverenliyi Günü ilə bağlı AZƏRTAC-a təqdim etdiyi yazıda yer alıb. Yazını təqdim edirik.
Suverenliyin bu əhəmiyyətini nəzərə aldıqda, onun yalnız siyasi və hüquqi müstəvidə deyil, dövlətin bütün inkişaf sahələri ilə sıx bağlı olduğunu görmək mümkündür. Davamlı suverenlik həm də güclü iqtisadiyyat, müasir texnologiyalar, inkişaf etmiş elm və təhsil sistemi və rəqabətqabiliyyətli insan kapitalı ilə tamamlanır. Başqa sözlə, güclü dövlət yalnız öz ərazisinə və sərhədlərinə nəzarət edən deyil, həm də öz inkişaf istiqamətlərini müstəqil müəyyənləşdirən, milli maraqlarını qoruyan və gələcəyini qurmaq üçün kifayət qədər daxili potensiala malik olan dövlətdir.
Azərbaycanın bugünkü dövlətçilik gücünün formalaşmasında Ümummilli Lider Heydər Əliyevin müstəsna xidmətləri qeyd edilməlidir. Ulu Öndərin zəngin dövlətçilik irsi, milli maraqlara əsaslanan siyasi kursu və müstəqil Azərbaycanın hərtərəfli inkişafına yönəlmiş strateji baxışı ölkəmizin siyasi və iqtisadi əsaslarının möhkəmləndirilməsində mühüm rol oynayıb. Bu irsin müasir dövrün çağırışlarına uyğun şəkildə davam etdirilməsi isə Azərbaycanın inkişafında ardıcıllığı və dövlətçilik ənənələrinin davamlılığını təmin edir.
Hazırda həmin siyasi kurs Müzəffər Ali Baş Komandan, Prezident İlham Əliyevin qətiyyətli və uzaqgörən siyasəti ilə layiqli şəkildə davam etdirilir. Azərbaycanın ərazi bütövlüyünün və suverenliyinin tam bərpası xalqımızın milli iradəsinin, dövlətimizin gücünün və uzunmüddətli strateji məqsədlərə əsaslanan siyasətin tarixi nəticəsidir. Əldə edilmiş suverenliyin bütün sahələrdə yeni inkişaf imkanlarına çevrilməsi üçün geniş perspektivlər açılıb.
Məhz bu yeni mərhələdə suverenliyin hərbi-siyasi təminatı ilə yanaşı, onun iqtisadi, elmi, texnoloji və intellektual dayaqlarının gücləndirilməsi xüsusi əhəmiyyət kəsb edir. Müasir dünyada dövlətlərin rəqabət qabiliyyəti getdikcə daha çox bilik, texnologiya və innovasiya imkanları ilə müəyyən olunur. Elmi bilik yaradan, qabaqcıl texnologiyalar inkişaf etdirən, innovasiyaları tətbiq edən və yüksək ixtisaslı mütəxəssislər yetişdirən ölkələr milli maraqlarını daha geniş imkanlarla qorumaq və dəyişən qlobal mühitdə müstəqil qərarlar qəbul etmək imkanlarını genişləndirirlər.
Bu baxımdan, elm və təhsil dövlət suverenliyinin uzunmüddətli möhkəmləndirilməsinin əsas dayaqlarından biridir. Buna görə də təhsilə və elmə qoyulan sərmayəni yalnız sosial və ya iqtisadi investisiya kimi deyil, həm də dövlətin gələcək gücünə və strateji müstəqilliyinə qoyulan sərmayə kimi qiymətləndirmək lazımdır. Bu prosesin mərkəzində isə insan dayanır. Suverenliyin gələcəyi, əslində, gələcəyin insanından başlayır. Savadlı, peşəkar, yaradıcı, təşəbbüskar və məsuliyyətli nəsil ölkənin inkişaf imkanlarını genişləndirir, cəmiyyətin dəyişən çağırışlara uyğunlaşma qabiliyyətini artırır. Ona görə də müasir təhsil yalnız yüksək ixtisaslı mütəxəssis hazırlamaqla kifayətlənməməli, eyni zamanda, öz ölkəsinin inkişaf perspektivlərini dərk edən, milli maraqlara həssas yanaşan, müstəqil düşünən və əldə etdiyi bilikləri cəmiyyətin və dövlətin inkişafına yönəldə bilən şəxsiyyətlər yetişdirməlidir.
İnsan kapitalının inkişafı xüsusilə Azərbaycanın işğaldan azad edilmiş ərazilərində həyata keçirilən Böyük Qayıdış prosesində mühüm əhəmiyyət daşıyır. Qarabağ və Şərqi Zəngəzurda aparılan genişmiqyaslı bərpa və quruculuq işləri dövlətimizin öz ərazisində müasir və dayanıqlı həyat mühiti formalaşdırmaq imkanlarının bariz göstəricisidir. Burada yeni şəhərlərin salınması, nəqliyyat və sosial infrastrukturun, təhsil və səhiyyə müəssisələrinin yaradılması ilə yanaşı, həmin ərazilərin uzunmüddətli inkişafını təmin edəcək insan kapitalının formalaşdırılması da strateji vəzifədir.
Qarabağ Universitetinin Xankəndidə fəaliyyət göstərməsi də məhz bu strateji yanaşmanın mühüm tərkib hissəsidir. Universitetin əsas missiyalarından biri Qarabağın və bütövlükdə Azərbaycanın gələcək inkişafına töhfə verə biləcək yüksəkixtisaslı insan kapitalının hazırlanmasıdır. Burada formalaşdırılan akademik mühitdə tələbələrin peşə bacarıqları ilə yanaşı, araşdırma, innovasiya, təşəbbüskarlıq və analitik düşünmə qabiliyyətlərinin inkişafına xüsusi diqqət yetirilir. Bununla universitet öz fəaliyyətini dövlətçilik və inkişaf məqsədləri ilə əlaqələndirir.
Bu gün qarşımızda duran əsas vəzifələrdən biri əldə olunmuş suverenliyin davamlı inkişaf üstünlüyünə çevrilməsi və onun gələcək nəsillər üçün daha möhkəm əsaslarının yaradılması işində fəal iştirak etməkdir. İnanırıq ki, Azərbaycanın gəncləri bu tarixi məsuliyyəti layiqincə daşıyacaq, əldə etdikləri bilik və bacarıqları ölkəmizin inkişafına yönəldəcək və dövlətimizin gücünün daha da artırılmasına öz töhfələrini verəcəklər. Qarabağ Universiteti də öz missiyası çərçivəsində Azərbaycanın intellektual potensialının gücləndirilməsinə, yeni nəsil mütəxəssislərin hazırlanmasına və bu yolla dövlətimizin davamlı inkişafına xidmət etməyi əsas vəzifələrindən biri hesab edir.
20 Sentyabr – Dövlət Suverenliyi Günü münasibətilə bütün həmvətənlərimizi səmimi-qəlbdən təbrik edir, Azərbaycanımıza davamlı sülh, əmin-amanlıq və tərəqqi arzulayırıq. Dövlətimizin ərazi bütövlüyü və suverenliyi uğrunda canından keçmiş şəhidlərimizin əziz xatirəsini dərin ehtiramla yad edir, onların qarşısında baş əyirik.
Əminik ki, güclü dövlətçilik iradəsi, milli birlik, yüksək insan kapitalı, elm və təhsilə əsaslanan inkişaf modeli Azərbaycanın suverenliyinin daha da möhkəmlənməsinin və ölkəmizin gələcək nəsillər üçün daha qüdrətli dövlət kimi inkişafının əsas dayaqlarından olacaq.
Müxbir – Tahir Ağaməmmədov
Bölmənin digər xəbərləri
