20 sentyabr Azərbaycan üçün xüsusi rəmzi məna daşıyır - RƏY
Bakı, 20 sentyabr, AZƏRTAC
Suverenlik Günü Azərbaycan üçün yalnız təqvimdə qeyd olunan bir tarix deyil, dövlət müstəqilliyi, ərazi bütövlüyü və milli iradə baxımından xüsusi siyasi və tarixi əhəmiyyət daşıyan gündür.
Azərbaycanın dövlətçilik tarixində suverenlik məsələsi həmişə əsas prioritetlərdən biri olub. 1991-ci il oktyabrın 18-də Azərbaycanın dövlət müstəqilliyini bərpa etməsi ilə ölkənin müstəqil dövlət kimi inkişafının hüquqi-siyasi əsası formalaşdı. Lakin müstəqilliyin elan olunması ərazi bütövlüyünün tam təmin edilməsi demək deyildi. 1990-cı illərin əvvəllərində Azərbaycan ərazilərinin bir hissəsi Ermənistanın işğalı altında qaldı və bu vəziyyət ölkənin suverenliyinin tam şəkildə həyata keçirilməsinə ciddi maneə yaratdı.
Bu sözləri AZƏRTAC-a açıqlamasında Milli Məclisin deputatı Nurlan Həsənov söyləyib.
O bildirib ki, 2020-ci il Vətən müharibəsi Azərbaycanın ərazi bütövlüyünün bərpası istiqamətində həlledici mərhələ oldu: “44 gün davam edən müharibədən sonra 2020-ci il noyabrın 10-da Azərbaycan, Ermənistan və Rusiya arasında üçtərəfli bəyanat imzalandı. Lakin Azərbaycanın bütün ərazisi üzərində suverenliyinin tam bərpası prosesi 2023-cü ildə yekunlaşdı. 2023-cü il sentyabrın 19-da Azərbaycan Ordusunun Qarabağda keçirdiyi hərbi əməliyyatlardan sonra bölgədə Azərbaycanın dövlət suverenliyinin bərpası təmin edildi. Sentyabrın 20-də Azərbaycan Prezidenti İlham Əliyev xalqa müraciətində ölkənin ərazi bütövlüyünün və suverenliyinin tam bərpa edildiyini bildirdi. Məhz bu hadisənin tarixi əhəmiyyəti nəzərə alınaraq, 20 sentyabr Azərbaycanda Dövlət Suverenliyi Günü kimi təsis edildi”.
"Suverenliyin bərpasının əhəmiyyəti yalnız hərbi nəticələrlə məhdudlaşmır. Dövlətin bütün ərazisində konstitusion quruluşun, qanunların və dövlət institutlarının fəaliyyət göstərməsi suverenliyin fundamental göstəricilərindəndir. Bu baxımdan 2023-cü ilin sentyabr hadisələri Azərbaycanın ərazi bütövlüyü məsələsində yeni mərhələnin başlanğıcı oldu.
Suverenlik həm də dövlətin öz xarici və daxili siyasətini müstəqil şəkildə müəyyənləşdirmək imkanını ifadə edir. Azərbaycanın son illərdə regional nəqliyyat, enerji və təhlükəsizlik layihələrində fəallığının artması da bu kontekstdə qiymətləndirilə bilər. Bakı–Tbilisi–Ceyhan neft kəməri, Cənub Qaz Dəhlizi, Bakı–Tbilisi–Qars dəmir yolu və Zəngəzur dəhlizi ətrafında aparılan müzakirələr Azərbaycanın regional bağlantılarda rolunun artmasını göstərən mühüm nümunələrdir", - deyə N.Həsənov vurğulayıb.
Deputat əlavə edib ki, suverenliyin bərpası Azərbaycan üçün, eyni zamanda, yeni məsuliyyətlər yaradır: “Ərazi bütövlüyünün təmin olunmasından sonra əsas məsələlərdən biri davamlı sülhün, təhlükəsizliyin və regional əməkdaşlığın möhkəmləndirilməsidir. Azərbaycan və Ermənistan arasında sülh prosesinin irəliləməsi, sərhədlərin müəyyənləşdirilməsi və nəqliyyat əlaqələrinin bərpası Cənubi Qafqazın gələcək inkişafı baxımından mühüm amillərdir. Suverenlik dövlətin ərazi bütövlüyü ilə yanaşı, onun siyasi müstəqilliyi, hüquqi sistemi, iqtisadi dayanıqlılığı və milli maraqlarını müstəqil şəkildə müdafiə etmək imkanlarını da əhatə edir.
20 sentyabr Azərbaycan üçün bu baxımdan xüsusi rəmzi məna daşıyır. Bu tarix ölkənin uzun illər davam edən münaqişə və işğal dövründən sonra öz ərazisi üzərində dövlət hakimiyyətini tam şəkildə bərpa etməsini ifadə edir. Qarşıdakı mərhələdə isə əsas hədəf əldə olunmuş suverenliyin möhkəmləndirilməsi, sülhün davamlı xarakter alması və Azərbaycanın bütün region üçün iqtisadi əməkdaşlıq və təhlükəsizlik baxımından sabit dövlət kimi rolunun gücləndirilməsidir”.
Bölmənin digər xəbərləri
