Aşıq Nəcəfin yaradıcılığı Qərbi Azərbaycanın mədəni yaddaşı kontekstində
Bakı, 16 oktyabr, AZƏRTAC
Qərbi Azərbaycan İcmasının inzibati binasında tədqiqatçı-jurnalist Araz Yaquboğlunun “Sındırılmış saz, yandırılmış aşıq” kitabının təqdimat mərasimi keçirilib.
Bu barədə AZƏRTAC-a AMEA-nın Folklor İnstitutundan məlumat verilib. Bildirilib ki, tədbirdə çıxış edən institutunun direktoru filologiya elmləri doktoru Hikmət Quliyev kitabın Aşıq Nəcəfin həyat və yaradıcılığının öyrənilməsi, Göyçə aşıq mühitinin və Qərbi Azərbaycanın tarixi-mədəni irsinin qorunması baxımından əhəmiyyətindən danışıb.
Hikmət Quliyev vurğulayıb ki, Prezident İlham Əliyevin 2022-ci il dekabrın 24-də Qərbi Azərbaycan İcmasının inzibati binasının açılışında iştirakı və bu məsələ ilə bağlı müəyyənləşdirdiyi strateji hədəflər istiqamətdə fəaliyyətin yeni mərhələsini müəyyən edib. Qərbi Azərbaycana qayıdış ideyasının elmi-mədəni əsaslarının möhkəmləndirilməsi tarixi yaddaşın, kollektiv təcrübənin və milli-mənəvi dəyərlərin qorunmasını da zəruri edir.
Daşkəndli Aşıq Nəcəfin irsinə toxunan Hikmət Quliyev onun Göyçə aşıq mühitinin dəyərli nümayəndələrindən biri olduğunu, Dədə Ələsgər məktəbinin davamçısı kimi saz-söz ənənəsinin yaşadılmasında özünəməxsus yer tutduğunu qeyd edib. Bildirib ki, aşığın yaradıcılığı Göyçənin zəngin sənət mühitini, ustad-şəyird münasibətlərini, xalqın estetik dünyasını və mənəvi dəyərlərini öyrənmək baxımından qiymətli folklor materialıdır. Onun sözlərinə görə, “Sındırılmış saz, yandırılmış aşıq” kitabı Aşıq Nəcəfin həyat və sənət yolunun araşdırılması, adının və yaradıcılıq irsinin yaşadılması baxımından əhəmiyyətli nəşrdir. Kitabın adı bir sənətkarın faciəli taleyi ilə yanaşı, bütöv bir mədəni mühitin üzləşdiyi faciəyə də işarə edir. Aşıq Nəcəfin irsi Göyçənin tarixi-mədəni yaddaşı, aşıq sənətinin davamlılığı və milli irsin qorunması kontekstində araşdırılmalıdır.
Folklor İnstitutunun fəaliyyətinə toxunan Hikmət Quliyev qeyd edib ki, müəssisədə Qərbi Azərbaycan folklorunun toplanılması, tədqiqi və nəşri üzrə kompleks işlər həyata keçirilir. Hazırda “Qərbi Azərbaycan folkloru” seriyasının VII və VIII cildləri nəşrə hazırlanır.
Sonda Hikmət Quliyev Aşıq Nəcəf kimi sənətkarların həyat və yaradıcılığının araşdırılmasının, onların irsinin elmi dövriyyəyə daxil edilməsinin və ictimaiyyətə çatdırılmasının Qərbi Azərbaycanın mədəni yaddaşının qorunması baxımından əhəmiyyətini vurğulayıb.
Bölmənin digər xəbərləri
