Nazir müavini: Yaşlı insanlarla bağlı sosial dəstək mexanizmlərinin təkmilləşdirilməsi prioritetdir
Bakı, 16 oktyabr, AZƏRTAC
Bakı şəhərində Müstəqil Dövlətlər Birliyinin (MDB) dövlətlərinin Əmək, Məşğulluq və Əhalinin Sosial Müdafiəsi üzrə Məşvərət Şurasının 39-cu iclası çərçivəsində “Aktiv və sağlam uzunömürlülük: dövlət siyasəti və sosial innovasiyalar” mövzusunda dəyirmi masa keçirilib.
Bu barədə AZƏRTAC-a Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən məlumat verilib.
Bildirilib ki, tədbirdə əmək və əhalinin sosial müdafiəsi nazirinin müavini Rəşad Mustafayev bu görüşün ölkələrimiz üçün getdikcə daha vacib olan bir mövzunu - aktiv və sağlam yaşlanmanı araşdırmaq, birgə müzakirə aparmaq imkanı yaratdığını qeyd edib.
O, yaşlı insanlarla bağlı sosial dəstək mexanizmlərinin də təkmilləşməsinin, onlarla bağlı sosial xidmətlərin fərdi ehtiyaclara uyğun daha effektiv və məqsədəuyğun təşkilinin prioritet önəm kəsb etdiyini bildirib. Habelə peşəkar fəaliyyətlərini davam etdirmək, yeni bacarıqlar öyrənmək istəyən yaşlı nəsillə bağlı müvafiq fəaliyyət sahələrində təkmilləşmələrin aparılmasının əhəmiyyəti qeyd edilib.
Dəyirmi masanın qeyd edilən sahələrdə müzakirələrin, fikir mübadilələrinin aparılması, MDB ölkələrinin təcrübələrinin öyrənilməsi və faydalı təcrübə mübadiləsi üçün əlverişli platforma olduğu vurğulanıb.
Sonra MDB İcraiyyə Komitəsinin nümayəndəsi Olqa Kremskaya qurumun Baş katibi Sergey Lebedevin tədbir üçün açılış nitqini səsləndirib.
Tədbirdə MDB Dövlətlərarası Statistika Komitəsi, MDB dövlətlərinin Əmək, Məşğulluq və Əhalinin Sosial Müdafiəsi üzrə Məşvərət Şurası Katibliyi, MDB dövlətlərinin əmək, məşğulluq və sosial müdafiə üzrə qurumlarının nümayəndələri tərəfindən “Demoqrafik dəyişiklik kontekstində sosial siyasət”, “Uzunömürlülük strategiyasının icrasında həyat keyfiyyətinə diqqət”, “Fəal və sağlam yaşlanma, sosial innovasiyalar” və digər mövzularda çıxışlar edilib.
MDB dövlətlərində yaşlı insanlarla bağlı sosial xidmətlər sisteminə, bu sahədə yeni yanaşmaların tətbiqi istiqamətində görülən işlərə, təhlillərə dair məlumatlar verilib, mövzu ətrafında müzakirələr aparılıb.
Bölmənin digər xəbərləri
