Üzüm, şərab və musiqi - Şamaxıda rəngli festivaldan FOTOLAR VİDEO
Şamaxı, 20 sentyabr, AZƏRTAC
Şamaxıda Üzüm və Şərab Festivalı sentyabrın 20-də işini davam etdirib.
AZƏRTAC-ın bölgə müxbiri xəbər verir ki, Meysəri kəndindəki “Şirvan şərabları” MMC-nin üzümçülük və şərabçılıq kompleksinin ərazisində baş tutan festivalda müxtəlif şərab brendləri öz pavilyonları ilə təmsil olunublar. Qonaqlar pavilyonları gəzib, müxtəlif növ üzümçülük və şərabçılıq məhsullarının dadına baxmaq imkanı qazanıblar.
Üzümçülük və şərabçılıq ənənələri ilə tanış olan ziyarətçilər müxtəlif əyləncə və şou proqramlara da qoşulublar.
Festivalda iştirak edən “Luxury Wine” MMC-nin kommersiya direktoru Afət Xudaverdiyeva bildirib ki, istehsalçılar və idxalçıların bu tədbirdə bir araya gəlməsi sevindiricidir. Qarşılıqlı əlaqələrin qurulur, yeni əməkdaşlıqlar yaranır.
“Dövlətimiz belə festivalların keçirilməsinə xüsusi dəstək verir. Festival turistlərin də diqqətini cəlb edib. Azərbaycanda bu qədər böyük şərab istehsalçısının bir araya gəlməsi möhtəşəmdir. Bu gözəl tədbirdə bizə göstərilən xüsusi dəstəyi də yüksək qiymətləndiririk”, - deyə o əlavə edib.
“Savalan Aspi Winery” şirkətinin satış direktoru Nizami Əliyev isə qeyd edib ki, bu cür tədbirlər Azərbaycanda istehsal olunan məhsulların nəinki ölkə daxilində, həm də xaricdə tanıdılmasına böyük dəstək olur: “Bu gün burada çox sayda xarici turistin iştirak etdiyini də görürük. Bu da bizim üçün böyük fürsətdir. Belə tədbirlərlə Azərbaycanın dünyada yalnız neft-qaz ölkəsi olmadığını göstərir, digər yerli məhsullarımızı və istehsal sahələrimizi də tanıtmaq imkanımız olur”.
Əyləncə dolu gün ərzində qonaqlar “Avroviziya” təmsilçimiz Dilarə Kazımova, Teymur Süleymanbəyli, Xalq artisti Zülfiyyə Xanbabayeva, eləcə də DJ Kamonun çıxışlarını izləyiblər.
Gün ərzində müxtəlif yaş qrupları üçün əyləncəli fəaliyyətlər festival proqramına xüsusi rəng qatıb. Ziyarətçilər müxtəlif müsabiqə və viktorinalarda iştirak ediblər.
Festivalın balaca qonaqları da yaddan çıxmayıb. Tədbir məkanında uşaq əyləncə zonası, balacalar üçün interaktiv proqram, animatorlar təşkil edilib.
Çoxsaylı iştirakçılar arasında olan İkram Əliyev deyib: “Mən Bakıdan gəlmişəm. Burada hər şey yüksək səviyyədə təşkil olunub. Düşünürəm ki, bu cür tədbirlər iqtisadi əlaqələrin inkişafı üçün yaxşı fürsətdir və iqtisadiyyatın inkişafına öz töhfəsini verə bilər”.
Bakıdan gələn Güllü Azayeva da hər il bu festivalda iştirak etdiyini söyləyib. O, əslən Şamaxıdan olduğunu bildirərək deyib: “Fəxr edirəm ki, mənim Vətənimdə, mənim torpağımda belə festival keçirilir. İllər öncə Şamaxı rayonu üzümçülükdə həmişə birinci yeri tuturdu. Festival çox gözəl təşkil edilib, zövq alırıq. İstərdim ki, bu festival illər boyu davam etsin, biz də burada iştirak edək”.
Xatırladaq ki, festival Şamaxı Rayon İcra Hakimiyyəti, “Abqora” restoranı və “Nəsimi bağları” kompleksinin təşkilatçılığı ilə keçirilib.
Festivalın məqsədi yerli üzüm və şərab istehsalının təşviqi, şərab məhsullarının ixrac potensialının artırılması, Azərbaycanda üzümçülük və şərab istehsalı tarixinin və bu sahədə görülən işlərin geniş ictimaiyyətə çatdırılmasıdır. İki gün ərzində qonaqlar Şamaxının unikal ab-havası, qastronomiya, yaradıcılıq və əyləncənin bir araya gəldiyi yaddaqalan festival təcrübəsi qazanıb.
Müxbir – Rəşad Türkoğlu
Bölmənin digər xəbərləri
