AZƏRBAYCAN-ÖZBƏKİSTAN BİRGƏ HÖKUMƏTLƏRARASI KOMİSSİYASININ İCLASI
İyulun 19-da “Gülüstan” sarayında əməkdaşlıq üzrə Azərbaycan-Özbəkistan birgə hökumətlərarası komissiyasının beşinci iclası olmuşdur.
İclasın gündəliyinə komissiyanın 2001-ci il 18 aprel tarixli dördüncü iclası qərarlarının yerinə yetirilməsinin gedişi, 2001-2010-cu illər üçün Azərbaycan Respublikası hökuməti ilə Özbəkistan Respublikası hökuməti arasında iqtisadi əməkdaşlıq proqramına aid tədbirlərin reallaşdırılmasının gedişi, Azərbaycan ilə Özbəkistan arasında ticarət-iqtisadi əməkdaşlığın perspektiv istiqamətləri, nəqliyyat sahəsində əməkdaşlıq, 1992-1994-cü illər üçün borc öhdəlikləri və tələblərinin tənzimlənməsinə dair 1997-ci il 19 iyul tarixli hökumətlərarası sazişin icrasının başa çatdırılması, elmi-texniki, mədəni və humanitar sahələrdə əməkdaşlığın inkişaf etdirilməsi, müqavilə-hüquq bazasının genişləndirilməsi, habelə birgə komissiyanın növbəti iclasının vaxtı və yeri haqqında məsələlər daxil idi.
İclası Azərbaycan baş nazirin birinci müavini, komissiyasının həmsədri Abbas Abbasov açdı. O dedi ki, 2001-ci ilin yekunlaurına görə, Azərbaycan Respublikası ilə Özbəkistan Respublikası arasında xarici ticarət dövriyyəsi 12,3 milyon dollar /Azərbaycandan məhsul göndərilməsi və xidmətlər - 8,5 milyon, Özbəkistandan isə 3,8 milyon dollar/ təşkil etmişdir ki, bu da 2000-ci ildəkindən 1,6 dəfə artıqdır.
2002-ci ilin birinci rübündə xarici ticarət dövriyyəsi 2,6 milyon dollar /Azərbaycandan məhsul göndərilməsi və xidmətlər - 1,8 milyon, Özbəkistandan isə 0,8 milyon dollar/ olmuşdur ki, bu da 2001-ci ilin müvafiq dövründəkindən 24,7 faiz çoxdur.
Abbas Abbasov bildirdi ki, əmtəə dövriyyəsinin indiki səviyyəsi ikitərəfli münasibətlərin real iqtisadi potensialına uyğun deyil və qarşılıqlı ticarətin daha da genişləndirilməsi üçün konkret addımlar atılmasını tələb edir.
Özbəkistan hökuməti sədrinin müavini Rüstəm Yunusov çıxışında vurğuladı ki, mövcud maneələri aradan qaldırmaq, həcmləri genişləndirmək, qarşılıqlı surətdə göndərilən məhsulların siyahısını çoxaltmaq hesabına ölkələrimiz arasında əmtəə dövriyyəsinin artırılmasına nail olmaq mümkündür. Bu, müvafiq dövlət idarəetmə strukturları və təsərrüfat subyektləri arasında daha sıx əlaqələr yaradılacağı təqdirdə tamamilə realdır.
İclasın sonunda sənədlərin imzalanması mərasimi oldu. Azərbaycan Ekologiya və Təbii Sərvətlər Nazirliyi ilə Özbəkistan Nazirlər Kabineti yanında Hidrometeorologiya İdarəsi arasında elmi-texniki əməkdaşlıq haqqında saziş, Azərbaycan Kənd Təsərrüfatı Nazirliyi ilə Özbəkistan Kənd və Su Təsərrüfatları Nazirliyi arasında kənd təsərrüfatı sahəsinədə əməkdaşlıq haqqında saziş və baytarlıq sahəsində əməkdaşlıq haqqında saziş imzalandı. Beşinci iclasın protokolu da imzalandı.
Bölmənin digər xəbərləri
