RƏSMİ XRONİKA
AZƏRBAYCAN POLİSİNİN YARANMASININ 89-CU İLDÖNÜMÜNƏ VƏ POLİS AKADEMİYASININ 2006-2007-Cİ TƏDRİS İLİNİN BURAXILIŞINA HƏSR OLUNMUŞ TƏNTƏNƏLİ MƏRASİMDƏ AZƏRBAYCAN PREZİDENTİ, SİLAHLI QÜVVƏLƏRİN ALİ BAŞ KOMANDANI İLHAM ƏLİYEVİN NİTQİ
![AZƏRBAYCAN POLİSİNİN YARANMASININ 89-CU İLDÖNÜMÜNƏ VƏ POLİS AKADEMİYASININ 2006-2007-Cİ TƏDRİS İLİNİN BURAXILIŞINA HƏSR OLUNMUŞ TƏNTƏNƏLİ MƏRASİMDƏ AZƏRBAYCAN PREZİDENTİ, SİLAHLI QÜVVƏLƏRİN ALİ BAŞ KOMANDANI İLHAM ƏLİYEVİN NİTQİ](/files/2007/2/1200x630/1486988448754448406_1200x630.jpg)
![](/media/newsimages/2007/July/file1183393414191.jpg)
Əziz generallar!
Əziz polis əməkdaşları!
Mən sizi və Daxili İşlər Nazirliyinin bütün şəxsi heyətini Azərbaycan polisi günü münasibətilə ürəkdən təbrik edirəm, hər birinizə cansağlığı, uğurlar arzulayıram.
89 il bundan əvvəl Azərbaycan Demokratik Respublikası tərəfindən Azərbaycanda ilk polis orqanı yaradılmışdır. O vaxt Azərbaycan müstəqilliyə qovuşan bir ölkə idi. Ancaq müstəqilliyimiz cəmi iki il davam etdi. Ondan sonra xarici qüvvələr Azərbaycanı yenidən işğal etdi və demokratik respublika süqut etdi. Bu tarix 1990-cı illərin əvvəllərində də təkrarlana bilərdi. Çünki o illərdə də cəmi ikinci ilini yaşayan müstəqil Azərbaycan öz dövlət müstəqilliyini itirə bilərdi. Azərbaycanda gedən xoşagəlməz proseslər, total böhran, xaos, anarxiya faktik olaraq Azərbaycanı parçalayırdı. Ölkəmizdə inkişaf üçün heç bir əsas yox idi. O illərdə Azərbaycan xalqı öz müdrikliyini göstərərək, ulu öndər Heydər Əliyevə müraciət etmiş, onu Azərbaycana siyasi rəhbərliyə dəvət etmişdi. Ondan sonra, 1993-cü ildən başlayaraq, Azərbaycan öz inkişaf yolunu uğurla davam etdirdi. Bütün xoşagəlməz proseslərin qarşısı alındı, xüsusilə polis orqanlarında fəaliyyət göstərən səriştəsiz, bacarıqsız, kriminal ünsürlərdən təmizlənmə getdi və beləliklə, bütün cəmiyyət normal yaşamağa başladı.
O vaxt polis orqanlarının çox böyük əhəmiyyəti var idi. Hər bir ölkənin polis orqanları çox böyük rola malikdir, o cümlədən də Azərbaycanda. Əfsuslar olsun ki, müstəqillik bərpa olunandan sonra polis orqanlarında vəziyyət ürəkaçan deyildi. Bir daha demək istəyirəm ki, orqanların rəhbərliyinə heç bir bacarığı, biliyi olmayan adamlar gətirilmişdi. Onlar bir çox hallarda nəinki cinayətkarlığa qarşı mübarizə aparmırdılar, hətta özləri cinayətlər törədirdilər. O illər hamımızın yadındadır. Məhz o illərdə ən böyük cinayətləri törədən insanlar polis orqanlarının rəhbər işçiləri idi, Daxili İşlər Nazirliyinin rəhbərləri idilər. Belə olan halda heç bir inkişafdan, sabitlikdən, heç bir irəliləyişdən söhbət gedə bilməzdi. Bütün cəmiyyətdə olduğu kimi, polis orqanlarında da təmizləmə aparıldı və bu gün Azərbaycan polisi öz vəzifə borcunu ləyaqətlə icra edir, Azərbaycanın hərtərəfli inkişafında öz rolunu oynayır. Azərbaycanda ictimai asayişin qorunmasında, sabitliyin saxlanmasında çox önəmli rol oynayır.
Ancaq, yenə də deyirəm, bütün dövrlərdə belə deyildi. 1990-cı illərin əvvəllərində ölkəmiz çox böyük təhlükələrlə üz-üzə qalmışdı və müstəqilliyimizi əldən verə bilərdik. Bu gün isə biz öz inkişaf dövrümüzü yaşayırıq. Polis orqanlarının bu işlərdə çox əhəmiyyətli vəzifələri vardır.
Dövlət tərəfindən polisə qayğı artır. Polisin məişət problemləri həll olunur. Biz bu sahəyə böyük diqqət göstəririk, mütəmadi qaydada maaşlar qaldırılır. Polis orqanlarında çalışan insanların sosial məsələləri bundan sonra da mütəmadi qaydada həll olunacaq, maaşlar bundan sonra da artırılacaqdır. Polis orqanlarında çalışan insanlar bütün sosial-məişət problemlərinin həlli baxımından ən yüksək səviyyədə olmalıdırlar. Çoxlu avadanlıq, texnika alınır, müasir tələblərə uyğun avadanlıq polisi gücləndirir. Biz müasir dövlət qururuq. Azərbaycanın hər bir sahəsi, hər bir sektoru ən müasir tələblərə cavab verməlidir. Bu məqsədlə çox böyük işlər görülür, xüsusi vəsait ayrılmışdır və bundan sonrakı illərdə də polisin maddi-texniki bazasının möhkəmləndirilməsi üçün lazımi işlər görüləcəkdir. Bunu etməyə bizim maddi imkanlarımız var. Azərbaycanın artan iqtisadi potensialı bizə istənilən məsələnin həllinə imkan yaradır. İqtisadi potensialın artması da öz növbəsində, Azərbaycanda bərqərar olunmuş sabitliyin nəticəsidir. Bu, başlıca şərtdir. Sabitlik olmayan ölkələrdə, ictimai təhlükəsizlik olmayan bir ölkədə heç vaxt heç bir inkişafdan, nə siyasi, nə də iqtisadi inkişafdan söhbət gedə bilməz.
Bu gün bizim uğurlu iqtisadi və siyasi işlərimizin, bu sahələrdə aparılan siyasətin təməlində Azərbaycanda mövcud olan sabitlik dayanır. Biz bunu gündəlik həyatda da görürük. Ardıcıl üç ildir ki, Azərbaycan dünyanın iqtisadi cəhətdən ən sürətlə inkişaf edən ölkəsidir və bu proses davam edir. Azərbaycanda çox böyük quruculuq, abadlıq işləri aparılır, çox gözəl ab-hava var. İctimai vəziyyət çox gözəldir. Xalqla iqtidar arasında əlaqələr çox yüksək səviyyədədir. Bizim həyata keçirdiyimiz bütün proqramlar Azərbaycan xalqının maddi rifahının yaxşılaşmasına yönəldilibdir.
Bir daha vurğulamaq istəyirəm ki, polis orqanlarının hər bir cəmiyyətdə çox böyük funksiyaları var. Onlardan biri də daxili sabitliyi qorumaq, asayişi qorumaq, cinayətkar dəstələrə qarşı barışmaz mübarizə aparmaqdır. Ölkədə vəziyyəti gərginləşdirmək istəyən, qanunsuz yollarla hakimiyyəti dəyişmək istəyən qüvvələrə qarşı barışmaz mübarizə aparmaqdır. Bunların hamısı Azərbaycanın tarixində yaşandı. Həm 1990-cı illərin əvvəllərində və bir də 2005-ci ildə.
Hamımız yaxşı xatırlayırıq, 2005-ci ildə parlament seçkiləri ərəfəsində Azərbaycanda vəziyyət bəzi cinayətkar ünsürlər və “siyasətçilər” tərəfindən süni şəkildə gərginləşdirilirdi. Buna siyasi səhnədə heç bir uğur qazanmayan və bütün nüfuzunu itirmiş “siyasətçilər” cəhdlər edirdilər. Onları maddi cəhətdən dəstəkləyən rüşvətxor və xəyanətkar məmurlar və bəzi xarici dairələr bu işlərdə iştirak edirdilər. Biz bunların hamısını bilirik. Bilirik ki, o vaxt Azərbaycanda vəziyyətin gərginləşdirilməsi, Azərbaycanda qanuni seçilmiş hakimiyyətin devrilməsi planları da kifayət qədər geniş şəkildə müzakirə olunurdu. Özü də həm Azərbaycanda, həm də Azərbaycanın hüdudlarından kənarda. Biz bütün bunları o vaxt da bilirdik, bu gün də bilirik. Onların bütün planları haqqında bizdə məlumatlar var idi. İndi Azərbaycanda elə bir vəziyyət yaranıb, elə məsələ yoxdur ki, biz onu bilməyək. Azərbaycanda bütün vəziyyət güclü nəzarət altındadır.
Əlbəttə ki, biz bunu bilirdik və öz tədbirlərimizi də görürdük. O vaxt Azərbaycanda “inqilab” etmək istəyən qüvvələrə Azərbaycan dövləti layiqli cavab verdi. İlk növbədə, xalqla iqtidar arasında birlik, Azərbaycan iqtidarının xalq tərəfindən dəstəklənməsi və Azərbaycan iqtidarının xalqa xidmət etməsi onların bütün bu planlarını alt-üst etdi. Digər tərəfdən, Azərbaycanın gücü, Azərbaycan dövlətinin gücü, əlbəttə, bu xoşagəlməz ssenarilərin həyata keçirilməsinə imkan vermədi. Ancaq belə planlar var idi. Təsəvvür etmək çətin deyil ki, əgər onların planları həyata keçsəydi, Azərbaycanı yenidən hansı bəlalar gözləyirdi.
Biz keçən il Bakı-Tbilisi-Ceyhan neft kəmərinin istismara verilməsini qeyd etdik. Əgər Azərbaycanda xaos yaransaydı, heç vaxt xarici investorlar vəsait qoymazdılar. Əgər biz o neft kəmərini inşa etməsəydik, təsəvvür etmək çətin deyil ki, bizim iqtisadi vəziyyətimiz tam başqa olardı. İqtisadi vəziyyət, öz növbəsində, siyasi vəziyyətə də təsir edir. Bu gün Azərbaycan öz xarici və daxili siyasətini tam müstəqil şəkildə aparır. Nəyin hesabına? Onun hesabına ki, biz heç kimdən asılı deyilik. Biz iqtisadi cəhətdən özümüzü təmin edirik. Enerji təhlükəsizliyi baxımından nəinki özümüzü təmin edirik, başqa ölkələrin enerji təhlükəzliyinə dəstəyimizi veririk. Əgər bunlar olmasaydı, əlbəttə, Azərbaycan başqa ölkələrin təsiri altına düşə bilərdi. Çünki iqtisadi cəhətdən asılı olan hər bir ölkə başqa ölkələrin təsiri altına düşür.
Əgər 2005-ci ildə Azərbaycanın düşmənlərinin, daxili və xarici düşmənlərinin planları baş tutsaydı, Bakı-Tbilisi-Ərzurum qaz kəməri heç vaxt tikilməyəcəkdi və bu gün biz nəinki Avropanın qaz təminatından danışa bilməzdik, hətta özümüzü qazla gücnən təmin edə bilərdik. Xüsusilə görürsünüz ki, bu bölgədə enerji məsələləri necə kəskinləşir.
Biz bu yaxınlarda Bakı-Tbilisi-Qars dəmir yolunun tikintisinə başlayacağıq. Əgər 2005-ci ildə Azərbaycan hakimiyyəti qanunsuz yollarla dəyişdirilsəydi, buna heç vaxt heç bir tərəf vəsait qoymazdı. Yəni, mən bu siyahını davam etdirə bilərəm. Əsas odur ki, Azərbaycan öz siyasətini müstəqil şəkildə aparır, görülən və gələcəkdə görəcəyimiz bütün işlər Azərbaycan xalqının maraqlarına cavab verir. Azərbaycanda çox güclü dövlətçilik ənənələri yaranıbdır, çox güclü iqtisadi potensial var, siyasi proseslər çox müsbət istiqamətdə inkişaf edir və beləliklə, ölkəmiz dünyanın aparıcı ölkələrinin siyahısına mütləq daxil olacaqdır.
O ki qaldı regional müstəvidə, heç kəs üçün sirr deyil ki, Azərbaycan regionda aparıcı rol oynayır. Ancaq hələ bu, bizim planlarımızın, görülən işlərin birinci mərhələsidir. Görün, iki ildən, beş ildən sonra Azərbaycan hansı dövlətə çevriləcəkdir. Biz bir neçə ildən sonra ölkəmizi iqtisadi cəhətdən güclü, siyasi cəhətdən güclü, öz siyasətini inamla aparan və sosial problemləri həll olunmuş vəziyyətdə görəcəyik.
2005-ci ilə bir daha qayıtmaq istəyirəm. Məhz o vaxt həm Azərbaycan xalqı öz sözünü dedi, həm də Azərbaycan polisi bütün bu qanunsuz hərəkətlərin qarşısını çox cəsarətlə, çox qətiyyətlə və lazım olan şəkildə aldı. Mənim yadımdadır, ondan sonra bəzi xarici təşkilatlar və dairələr bizə təzyiq etməyə çalışdılar. Hətta tələb edirdilər ki, polis işçiləri cəzalandırılsın, onlar həbs olunsunlar, cinayət işləri açılsın. İmkan vermədim. Bütün bu tələbləri rədd etdim və dedim ki, bir nəfər də polis işçisi cəzalandırılmayacaqdır. Çünki onlar öz vəzifə borcunu yerinə yetirir, dövlətçiliyin keşiyində dururdular. Onlar qanunsuz cinayətkar hərəkətlərin qarşısını alırdılar. Mən bu gün də Azərbaycan polisini dəstəkləyirəm, polisin inkişafı üçün bütün lazımi tədbirləri görürəm. Həm polisin maddi-texniki bazasının möhkəmləndirilməsi üçün, həm sosial problemlərinin həlli üçün və həm də cəmiyyətdə nüfuzunun qaldırılması üçün.
Ancaq polis işçiləri də, əlbəttə, öz fəaliyyəti ilə, öz hərəkətləri ilə elə etməlidirlər ki, xalq tərəfindən daha da böyük hörmətə layiq olsunlar. Ona görə müasir tələblərə uyğun şəkildə polis kadrları hazırlanmalıdır. Biz müasir ölkə qururuq, Avropaya inteqrasiya edirik. Avropa İttifaqı ilə beşillik qonşuluq proqramına qoşulmuşuq. Yəni, Azərbaycanda növbəti beş ildə bütün meyarlar Avropa İttifaqının meyarlarına ya uyğun, yaxud da ona çox yaxın olmalıdır. O cümlədən, hüquq mühafizə orqanları sahəsində. Ona görə Azərbaycan polisinin həm maddi-texniki təchizatı, həm avadanlığı, həm də hərəkətləri, ən əsası isə, işi, qabiliyyəti, peşəkarlığı dünyanın ən yüksək standartlarına cavab verməlidir.
Bu işlərdə Polis Akademiyasının böyük rolu var. Mən bu gün çox şadam ki, burada gördüyüm işlər yüksək səviyyədədir. Burada oxumaq üçün, yaxşı təhsil almaq üçün bütün imkanlar var. Ən müasir avadanlıq, gözəl binalar, tədris korpusları, yeməkxana, yataqxanalar, yəni gözəl təhsil almaq üçün bütün şərait var. Polis Akademiyasının da rolu artır. Çünki Polis Akademiyasında oxuyan kursantlar müasir tələblərə cavab verməlidirlər, ona görə tədris prosesinə çox böyük diqqət yetirilməlidir. Akademiyanı bitirən kursantlar ən yüksək meyarlara, ən yüksək tələblərə cavab verməlidirlər.
Əziz dostlar, mən bu əlamətdar gündə sizi bir daha ürəkdən təbrik etmək istəyirəm. Bir də demək istəyirəm ki, Azərbaycan polisinin çox böyük və şərəfli yolu var. Bu yol Azərbaycan dövlətçiliyinin yoludur. Bizim əsas gücümüz Azərbaycan dövlətçiliyidir, Azərbaycanın müstəqilliyidir, müstəqil ölkə kimi inkişafımızdır. Biz bu gün bunu çox böyük qürur hissi ilə deyə bilərik ki, Azərbaycan müstəqil ölkə kimi dünyada öz yerini tuta bildi. Bizim ardıcıl inkişafımız, siyasi və iqtisadi qələbələrimiz, əlbəttə ki, bizə yeni uğurlar gətirəcəkdir.