AZƏRBAYCAN RESPUBLİKASI MİLLİ TƏHLÜKƏSİZLİK NAZİRLİYİNİN BƏYANATI
Son vaxtlar radikal müxalifətin mövqelərini əks etdirən kütləvi informasiya vasitələrində, xüsusilə də “Yeni Müsavat” qəzetində PKK-nın Azərbaycanda guya geniş fəaliyyət göstərməsi barədə silsilə məqalələr dərc olunmaqdadır. Bununla əlaqədar Milli Təhlükəsizlik Nazirliyində “Yeni Müsavat” qəzetinin rəhbərliyinə həmin yazıların əsassız olduğu rəsmi surətdə bildirilmiş, ölkədə hüquq-mühafizə orqanlarının beynəlxalq terrorizmə, o cümlədən PKK terrorçularına qarşı apardığı mübarizə barəsində konkret faktlar və rəqəmlər göstərilməklə müfəssəl məlumat verilmişdir.
Lazımi nəticələr çıxarılmadığına görə, nazirlik ötən həftə ərzində ölkə qanunvericiliyində nəzərdə tutulmuş qaydada qəzetə rəsmi sorğular vermiş, müvafiq tədbirlər görülməsi üçün mövcud sənəd və sübutları nazirliyə göndərməyi xahiş etmişdir. “Yeni Müsavat” qəzeti bu günədək yazılardakı iddiaları təsdiqləyəcək heç bir sənəd-sübut təqdim etməmişdir. Redaksiyadan alınmış rəsmi cavablar isə göstərir ki, qəzet rəhbərliyində belə faktlar yoxdur.
Bütün bunlarla əlaqədar Milli Təhlükəsizlik Nazirliyi bir daha və qətiyyətlə bəyan edir ki, “PKK təhlükəsi” barədə müxalif qüvvələr tərəfindən qaldırılmış hay-küy əsassızdır, hazırda PKK-nın Azərbaycanda hansısa bir fəaliyyəti haqqında nazirlikdə məlumat yoxdur. Respublikanın hüquq-mühafizə orqanları ölkədəki əməliyyat şəraitini tam nəzarətdə saxlayır, milli mənafeləri hər cür təhdidlərdən, o cümlədən terrorizm təhlükələrindən qorumaq üçün ardıcıllıqla mübarizə aparırlar.
Kürd İşçi Partiyası (PKK) ABŞ Dövlət Departamenti tərəfindən 1990-cı illərin əvvəllərində, Avropa Birliyinə daxil olan 15 dövlət tərəfindən cəmi bir ay öncə rəsmi surətdə terrorçu təşkilat kimi tanınmışdır. Yarandığı ilk günlərdən Türkiyə Respublikasını özünə arxa və dost ölkə hesab edən müstəqil Azərbaycan Respublikası isə mövcudluğunun bütün 10 ili ərzində PKK-çılara münasibətdə qardaş türk xalqı ilə bir mövqedə olmuş, respublikanın hüquq-mühafizə orqanları türkiyəli həmkarları ilə sıx əməkdaşlıq zəminində PKK terrorçularına qarşı Azərbaycan ərazisində ardıcıl və qətiyyətli mübarizə aparmış, önəmli nəticələr əldə etmişlər.
Son illər ərzində Azərbaycan Respublikasının hüdudlarında 33 nəfər PKK-çı tutulub saxlanmış, onlardan 14 nəfəri Türkiyəyə, 1 nəfəri Qazaxıstana, 1 nəfəri isə Rusiya Federasiyasına təhvil verilmişdir. Təkcə 2000-2001-ci illərdə Azərbaycan ərazisindən istifadə etməklə qeyri-qanuni yolla İrandan Ermənistana və geriyə keçməyə cəhd göstərən 16 nəfər PPK-çı və onlara bələdçilik edən 1 nəfər Azərbaycan vətəndaşı barəsində 4 cinayət işi aparılmış, həmin şəxslər məhkəmə orqanları tərəfindən müxtəlif müddətlərə azadlıqdan məhrum edilmişlər. Milli Təhlükəsizlik Nazirliyi tərəfindən həyata keçirilmiş əməliyyat-axtarış, istintaq, sərhədlərin möhkəmləndirilməsi tədbirləri və digər tədbirlər nəticəsində PKK-çıların respublikada təşkilatlanmaq, Azərbaycan ərazisindən tranzit kimi istifadə cəhdlərinin, digər düşmənçilik niyyətlərinin qarşısı alınmışdır və bundan sonra da alınacaqdır.
Azərbaycan Respublikası təcavüzkar separatçılığın ən fəlakətli təzahürü olan terrorçuluqdan saysız bəlalar çəkmiş dövlətdir. Odur ki, ölkə rəhbərliyi terrorizmin hər hansı bir formada təzahürünə qarşı qətiyyətli mübarizə zərurətini bütün güc strukturları qarşısında prioritet vəzifələrdən biri kimi qoymuşdur və həmin vəzifələrin icrasını daim nəzarətdə saxlayır.
Məhz indiki iqtidar dövründə respublikada yüzlərlə terrorçu zərərsizləşdirilmiş, terrorçu-separatçı “Sadval”, “Ceyşullah”, “Hizbut-Təhrir” təşkilatları tam ifşa edilərək, onların cinayətkar fəaliyyətinə son qoyulmuş, humanitar niyyətlər və digər örtüklər altında beynəlxalq terrorçu qurumlara yardım göstərən dörd xarici humanitar təşkilat qapadılmış və ölkə ərazisindən çıxarılmışdır.
Azərbaycan Respublikası 2001-ci ilin sentyabr hadisələrindən sonra antiterror koalisiyasına ilk qoşulan dövlətlərdən biridir. Təkcə son səkkiz ay ərzində həmin faciə ilə bu və ya digər dərəcədə əlaqəli olan 31 xarici ölkə vətəndaşı respublika ərazisində yaxalanaraq, axtarış elan etmiş dövlətlərə təhvil verilmişdir. Ölkəmizin beynəlxalq terrorizmə qarşı mübarizədə mövqeyinə və əldə etdiyi konkret nəticələrə dünya miqyasında ən mötəbər səviyyələrdə dəfələrlə verilmiş yüksək qiymət xalqımıza yaxşı məlumdur.
Məhz belə bir şəraitdə radikal müxalifət tərəfindən heç bir əsas, sübut göstərilmədən iqtidarın PKK terrorçularına havadarlıqda təqsirləndirilməsi, əslində, onların yaxınlaşmaqda olan prezident seçkiləri ərəfəsində ictimai-siyasi sabitliyin pozulmasına yönəlmiş cəhdləri kimi qiymətləndirilməli və qətiyyətlə pislənməlidir.
Real, yaxud təxəyyül məhsulu olan təhlükələrin hansısa millətin adı ilə bağlanıb qabardılması çoxmillətli ölkəmizin ərazisində yaşayan bütün vətəndaşların insan haqlarına hörmət prinsipini öz daxili siyasətinin əsasına qoymuş dövlətimizin milli maraqlarına ziddir və yolverilməzdir.
Mövcud ictimai-siyasi sabitlik bu gün müstəqil Azərbaycanın ən dəyərli nemətidir, ölkədə dövlətçiliyin bərqərar olması, iqtisadiyyatın təşəkkülü, xalqın bu günü və sabahı naminə dünya iqtisadiyyatına inteqrasiyası üçün ilkin şərtlərdən biridir. Azərbaycan Respublikasının Prezidenti möhtərəm Heydər Əliyevin bilavasitə rəhbərliyi altında son illər həyata keçirilmiş ardıcıl və məqsədyönlü tədbirlər nəticəsində xalqın əldə etdiyi bu nailiyyətə ucuz siyasi məqsədlər naminə xələl gətirilməsini Azərbaycanı bir Vətən olaraq doğrudan da sevən, bu xalqın mənafelərinə sadiq olduğunu bəyan edən heç bir qüvvə, yaxud fərq özünə rəva bilməməlidir.
Bölmənin digər xəbərləri
