AZƏRBAYCAN RESPUBLİKASININ YENİ GEOLOJİ XƏRİTƏSİ TƏRTİB OLUNMUŞDUR
İyunun 13 -də Azərbaycan Milli Elmlər Akademiyası (AMEA) rəyasət heyətinin iclası keçirilmişdir.
Akademiyadan AZƏRTAC-a bildirmişlər ki, AMEA, Ekologiya və Təbii Sərvətlər Nazirliyi, həmçinin Dövlət Neft Şirkəti kollektivinin bilavasitə iştirakı ilə elmi-nəzəri, geoloji planalma, geoloji-axtarış işlərinin son nəticələrinə əsaslanan geoloji-geofiziki və tektonik materiallar əsasında Azərbaycan Respublikasının yeni 1:500 000 miqyaslı geoloji xəritəsi tərtib olunmuşdur.
İclasda AMEA-nın müxbir üzvü H.Mustafayevin xəritə haqqında məruzəsi dinlənilmişdir.
H.Mustafayev 1975-ci ildə Azərbaycan Respublikasının 1:500 000 miqyaslı axırıncı geoloji xəritəsinin çap olunduğu vaxtdan ötən 30 il ərzində bu ərazidə irimiqyaslı geoloji-planalma işlərinin aparıldığı və ayrı-ayrı regionların geoloji xəritələrinin tərtib olunduğu barədə məlumat vermişdir. Bildirilmişdir ki, aparılmış tədqiqatlar əsasında Azərbaycanın yeni geoloji xəritəsində ilk dəfə olaraq, Xəzər dənizinin Azərbaycan sektorunda şelf zonası kompleksləri ayrılmış və Böyük Qafqazın cənub və Kiçik Qafqazın şimal-şərq yamaclarında aparılan irimiqyaslı geoloji planalmanın nəticələri əks olunmuşdur.
Sonra akademiklər Budaq Budaqov, Bəkir Nəbiyev, Akif Əlizadə və başqaları çıxış etmiş, fikir mübadiləsi aparmışlar.
Bölmənin digər xəbərləri
