AZƏRBAYCAN SOSİAL RİFAH PARTİYASI PREZİDENT SEÇKİLƏRİNDƏ İLHAM ƏLİYEVİN NAMİZƏDLİYİNİ MÜDAFİƏ EDƏCƏKDİR
İyulun 5-də Azərbaycan Sosial Rifah Partiyasının V qurultayı keçirilmişdir. Qurultayda partiya sədrinin, ali məclisin və təftiş-nəzarət komissiyasının hesabatları dinlənildikdən sonra təşkilati məsələlərə baxılmışdır. Xanhüseyn Kazımlı ASRP-nin sədri seçilmişdir. Qurultayda AŞPA sədrinin müavini və Büro üzvü, Yeni Azərbaycan Partiyası sədrinin birinci müavini, ARDNŞ-in birinci vitse-prezidenti, Milli Məclisin deputatı İlham Heydər oğlu Əliyevin oktyabrın 15-də keçiriləcək seçkilərdə prezidentliyə namizədliyi irəli sürüldü. Müzakirələrdən sonra İlham Əliyevin Azərbaycan Respublikası prezidentliyinə namizədliyi qurultay nümayəndələri tərəfindən yekdilliklə qəbul edildi. Bu münasibətlə Azərbaycan xalqına müraciət qəbul olundu. Müraciətdə deyilir ki, Azərbaycan tarixinin son yarıməsrlik dövrünün əhatəli təhlili və qiymətləndirilməsi belə bir həqiqəti aşkar edir ki, görkəmli ictimai-siyasi xadim Heydər Əliyevin 34 il bundan əvvəl respublika rəhbərliyinə gəlməsi öz əhəmiyyətinə və əzəmətli nəticələrinə görə əlamətdar bir hadisə olaraq yaddaşlarda qalmaqdadır. Heydər Əliyevin Azərbaycana rəhbərliyi dövrü ən yeni tariximizə siyasi, iqtisadi və mədəni yüksəliş illəri kimi daxil olmuşdur. Müstəqilliyimizin dönməzliyi və əbədiliyi, milli dövlətçilik ideologiyasının formalaşdırılması, cəmiyyət və dövlət həyatının bütün sahələrindəki uğurlarımız Heydər Əliyevin yorulmaz fəaliyyəti, ardıcıl və kəsərli siyasəti ilə bağlıdır. Müraciətdə daha sonra deyilir ki, xalqımızın milli lideri Heydər Əliyevin tarixi xidmətləri təkcə dövlətçiliyin möhkəmləndirilməsi, bu yolda hər cür təhlükələrin aradan qaldırılması, ölkənin sosial-iqtisadi və mədəni tərəqqisinin təmin edilməsindən ibarət olmayıb, həm də həyatımızın bütün sahələrində ən uzaq perspektivlərin ağırlıqlarına cəsarətlə sinə gərə bilən gənc nəslin formalaşmasında da özünü göstərməkdədir. Ölkənin dövlət idarəçiliyinin bütün sahələrindəki məsul vəzifələrdə çoxsaylı gənclərin çalışması buna parlaq misaldır. Belə gənclərdən biri də Yeni Azərbaycan Partiyası sədrinin birinci müavini, Azərbaycan Dövlət Neft Şirkətinin birinci vitse-prezidenti, Milli Məclisin deputatı, AŞPA sədrinin müavini və Büro üzvü İlham Əliyevdir. Biz, ASRP-nin V qurultayının nümayəndələri hesab edirik ki, Azərbaycanda iqtisadi inkişafın və mövcud ictimai-siyasi sabitliyin təminatçısı olan Heydər Əliyevin və İlham Əliyevin siyasi kursu eyni strategiya üzərində köklənməklə geniş ictimaiyyət tərəfindən qətiyyətlə müdafiə olunur. Bütün bunları nəzərə alaraq biz sosial rifahçılar oktyabr ayının 15-də keçiriləcək prezident seçkilərində xalqımızın böyük oğlu Heydər Əliyev məktəbinin layiqli yetirməsi, Azərbaycan gənclərinin özlərinə öndər bildikləri, beynəlxalq miqyaslı nüfuz sahibi İlham Əliyevin namizədliyini irəli sürür və müdafiə edirik. Müraciət bu sözlərlə bitir: Sağlam düşüncəli bütün insanları Azərbaycan xalqının daha uzaq perspektivlərə hesablanmış taleyüklü problemlərinin uğurla həll edilməsində tükənməz potensiala malik, dövlət idarəçiliyi sahəsində dünyəvi təcrübə qazanmış İlham Heydər oğlu Əliyevin prezidentliyə namizədliyinin müdafiəsinə qoşulmağa çağırırıq.
Bölmənin digər xəbərləri
