Bakı, 25 iyul, Pərvanə Rəhimova, AZƏRTAC

Əmlak Məsələləri Dövlət Komitəsi (ƏMDK) tərəfindən iyulun 25-də “Azərbaycanda Milli Məkan Məlumatları İnfrastrukturunun əsasları” adlı konfrans keçirilib.

AZƏRTAC xəbər verir ki, tədbirdə ƏMDK-nın sədri Kərəm Həsənov, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, İsrailin Azərbaycandakı səfiri Dan Stav, Milli Məkan Məlumatları İnfrastrukturunun yaradılması işlərini həyata keçirən İsrailin “Ofek Aerial Photography” şirkətinin rəhbərliyi və nümayəndələri iştirak ediblər.

Konfransın məqsədi Milli Məkan Məlumatları İnfrastrukturunun formalaşdırılması, idarə olunması, aktuallığının təmin edilməsi, inteqrasiyası və mühafizəsi ilə bağlı işləri daha da təkmilləşdirmək, sistemin yaradılması ilə əlaqədar qarşılıqlı əməkdaşlığı genişləndirmək olub.

K.Həsənov Prezident İlham Əliyevin rəhbərliyi ilə dövlətin idarəetmə mexanizminin innovativ üsullarla həyata keçirildiyini, o cümlədən elektron hökumət quruculuğu, geoməkan standartlarının tətbiqi sahələrində işlərin təkmilləşdirildiyini deyib. Bildirib ki, ölkədə qurulmasına başlanan Milli Məkan Məlumatları İnfrastrukturu Elektron hökumətin ayrılmaz tərkib hissəsini təşkil edir. Bu baxımdan Azərbaycan Respublikası Prezidentinin 2018-ci il 28 dekabr tarixli Fərmanı ilə “Milli məkan məlumatlarının formalaşdırılması və inteqrasiyası Qaydaları” təsdiq olunub. Bu Qaydalar milli məkan məlumatlarının formalaşdırılması, aktuallığının təmin olunması və inteqrasiyası, o cümlədən milli məkan məlumatları üzrə xidmətlərin göstərilməsi prosedurlarını müəyyən edir. Fərmana uyğun olaraq, Əmlak Məsələləri Dövlət Komitəsinə Milli Məkan Məlumatları İnformasiya Sisteminin yaradılması və həmin sistemin Elektron Hökumət İnformasiya Sisteminə inteqrasiyası işi həvalə edilməklə komitə sistemin operatoru kimi müəyyən olunub.

O qeyd edib ki, bu infrastruktur dövlətin məkanla bağlı əsas məlumat bazası olub, özündə çoxlu sayda mövcud müxtəlif mənbələrin məlumatlarını birləşdirməklə onları konkret coğrafi yerləşmə və zaman kəsiyinə uyğun sistemləşdirir. Bu infrastruktur istənilən sahədə idarəetmə ilə bağlı düzgün qərarların qəbul edilməsini, dövlət qurumları tərəfindən məkana bağlı məlumatın operativ əldə olunmasını, ümumilikdə qurumlar arasındakı qarşılıqlı əlaqənin səmərəli təşkilini təmin edir.

Komitə sədri bildirib ki, Milli Məkan Məlumatları İnfrastrukturunun qurulması ilə bağlı tədbirlər görülməsi üçün aidiyyəti dövlət qurumlarının nümayəndələrindən ibarət işçi qrupu yaradılıb, verilmiş tapşırıqların icrası olaraq bir sıra normativ hüquqi aktların ilkin layihələri hazırlanaraq aidiyyəti üzrə təqdim edilib. Eyni zamanda, Milli Məkan Məlumatları İnformasiya Sisteminin formalaşdırılması və Elektron Hökumət İnformasiya Sisteminə inteqrasiyası ilə bağlı məsləhətçi xidmətlərinin cəlb edilməsi üzrə açıq tender keçirilib və İsrailin beynəlxalq nüfuzlu “Ofek Aerial Photography” şirkəti tenderin qalibi olub.

K.Həsənov deyib ki, Torpaqların Elektron Kadastr Uçotu Sistemi müasir tələblərə uyğun Milli Məkan Məlumatları İnfrastrukturunun formalaşmasında mühüm rol oynayacaq. Ölkəmizdə Milli Məkan Məlumatları İnformasiya Sisteminin yaradılmasına böyük töhfə verəcək layihələrdən biri də “Yer Səthinin Peyk Nəzarəti Sistemi”nin qurulması layihəsidir.

Komitə sədri qeyd edib ki, Milli Məkan Məlumatları İnfrastrukturunun yaradılması ölkədə iqtisadiyyatın və idarəetmənin səmərəliliyinə müsbət təsir edən amillərdən biridir. Həmçinin Milli Məkan Məlumatları İnfrastrukturunun dövlət və biznes qurumlarının operativ və şəffaf qarşılıqlı əlaqəsinin təmin edilməsində xüsusi rolu var.

Ü.Mehdiyev isə ölkəmizdə elektron hökumətin inkişafı və rəqəmsal hökumətə keçidlə bağlı dövlət başçısının tapşırıqlarına uyğun olaraq mühüm layihələrin həyata keçirildiyini qeyd edib. O, Milli Məkan Məlumatları İnfrastrukturunun rəqəmsal hökumətin vacib komponentlərindən biri olduğunu və bu sistemin tez bir zamanda qurulmasının vacibliyini vurğulayıb. Bildirib ki, müvafiq Fərmana əsasən, agentlik milli məkan məlumatlarının ilkin mənbəyini və onları formalaşdıran aidiyyəti dövlət qurumlarının siyahısını müəyyən edir.

Konfransın əhəmiyyətinə toxunan İsrailin ölkəmizdəki səfiri D.Stav isə deyib ki, Milli Məkan Məlumatları İnfrastrukturunun yaradılması ilə dövlət qurumlarının idarəetməsində daha operativ qərarlar qəbul ediləcək.

Sonra Əmlak Məsələləri Dövlət Komitəsi ilə İsrailin “Ofek Aerial Photography” şirkəti arasında Milli Məkan Məlumatları İnformasiya Sisteminin formalaşdırılması və Elektron Hökumət İnformasiya Sisteminə inteqrasiyası ilə bağlı məsləhətçi xidmətlərin göstərilməsinə dair müqavilə imzalanıb. Sənədi ƏMDK-nın sədr müavini Rüstəm Şahbazov və “Ofek Aerial Photography”nin icraçı direktoru David Peretz imzalayıblar.

“Ofek Aerial Photography” şirkətinin vitse-prezidenti Oded Erphat bildirib ki, Azərbaycanda Milli Məkan Məlumatları İnfrastrukturunun yaradılması üçün cari vəziyyət öyrənilir və bu infrastrukturun qurulmasına dair qabaqcıl beynəlxalq təcrübədən istifadə etməklə müvafiq təkliflərin təqdim edilməsi həyata keçirilir.

Xarici şirkətin nümayəndələrinin Azərbaycanda Milli Məkan Məlumatları İnformasiya Sisteminin qurulmasının başlıca məqsədləri və verəcəyi töhfə, onun hüquqi aspektləri, eləcə də layihənin icra planı ilə bağlı təqdimatlar olub.

Sonda Milli Məkan Məlumatları İnformasiya Sisteminin formalaşdırılması və Elektron Hökumət İnformasiya Sisteminə inteqrasiyası ilə bağlı tədbir iştirakçılarını maraqlandıran suallar cavablandırılıb.