Azərbaycanda terrorizmlə mübarizə sahəsində müasir qanunvericilik bazası yaradılmışdır
Bakı, 21 iyun (AZƏRTAC). Dünya dövlətləri kimi Azərbaycan da terrorizmlə mübarizədə qəti mövqe tutmuşdur. Müstəqil Azərbaycanda ümummilli lider Heydər Əliyevin hakimiyyətə qayıdışından sonra problemin həllinə diqqət daha da artmış, ölkəmizin terrorizmə qarşı mübarizəsi beynəlxalq miqyas almışdır. ABŞ-da 2001-ci ilin sentyabrın 11-də baş vermiş müdhiş hadisədən dərhal sonra ulu öndərin bəyanatla çıxış edərək terrorla mübarizədə Birləşmiş Ştatların yanında olduğunu bildirməsi bunu bir daha sübut edir. Bu isə Azərbaycanın terrorizmə qarşı mübarizədə qəti mövqeyinin bariz nümunəsi idi.
Bütün bunlar ondan irəli gəlir ki, Azərbaycan özü də terrordan əziyyət çəkən ölkədir. Neçə illərdir ki, Azərbaycan terrorun dövlət səviyyəsində dəstəkləndiyi Ermənistan tərəfindən soyqırımı və digər faciələrə məruz qalır. Torpaqlarının 20 faizindən çoxu işğal olunmuş, əhalisinin 1 milyonu qaçqın və məcburi köçkün həyatı yaşayır.
Azərbaycan torpaqlarının işğaldan azad edilməsi ilə bağlı BMT Təhlükəsizlik Şurası, ATƏT, Avropa ittifaqı, Avropa Parlamenti, Avropa Şurası, İslam Konfransı Təşkilatı müvafiq qətnamə və qərarlar qəbul etmişlər. Lakin təcavüzkar və terrorçu Ermənistan bu sənədlərə məhəl qoymur. Azərbaycan isə öz mövqeyində dönməzdir. Terrorla mübarizənin səmərəliliyini artırmaq üçün müvafiq tədbirlər görür, beynəlxalq təşkilatlarla sıx əməkdaşlıq edir. Ölkəmizin antiterror koalisiyasının fəal üzvü olması, terrorçuluqla mübarizəyə dair əsas beynəlxalq konvensiyalara qoşulması, milli qanunvericiliyimizin təkmilləşdirilməsi, beynəlxalq normalara cavab verən normativ hüquqi aktları hazırlaması dövlətimizin terrorçuluğa qarşı mübarizədə barışmaz mövqe tutduğunun bariz göstəricisidir.
Qeyd etmək lazımdır ki, antiterror koalisiyasında uğurlu əməkdaşlıq nəticəsində ölkəmizin hüquq mühafizə orqanları beynəlxalq terrorda günahlandırılan onlarca insanı həbs etmiş, bir çox terror təşkilatlarının maliyyələşdirilməsinin qarşısını almışdır.
Ümumiyyətlə terrorizmlə mübarizə istiqamətində Azərbaycanın gördüyü tədbirlər nüfuzlu beynəlxalq qurumlar tərəfindən də yüksək qiymətləndirilir. ABŞ konqresinin üzvləri, NATO-nun ekspertləri, eləcə də digər dövlətlərin diplomatları öz çıxışlarında Azərbaycanın antiterror əməliyyatlarındakı iştirakını xüsusi qeyd etmişlər. Azərbaycan hərbçiləri dəfələrlə NATO komandanlığının təşəkkürünə və medallarına layiq görülmüşlər.
Terrorçuluğa qarşı mübarizənin hüquqi bazasının möhkəmləndirilməsi də diqqət mərkəzindədir. Beynəlxalq standartlara uyğun hazırlanmış “Terrorçuluğa qarşı mübarizə haqqında” Qanun respublikamızda terrorçuluğa qarşı mübarizənin hüquqi və təşkilati əsaslarının müəyyən edilməsində, terrorçuluq əleyhinə mübarizəni həyata keçirən dövlət orqanlarının fəaliyyətinin əlaqələndirilməsində, habelə həmin orqanların və vətəndaşların hüquqlarının və vəzifələrinin təsbit edilməsində hüquqi normativ sənəddir.
Qanunda bildirilir ki, terrorçuluq - ictimai təhlükəsizliyi pozmaq, əhali arasında vahimə yaratmaq, yaxud dövlət hakimiyyət orqanları və ya beynəlxalq təşkilatlar tərəfindən qərar qəbul edilməsinə təsir göstərmək məqsədi ilə insanların həlak olması, onların sağlamlığına və əmlakına zərər vurulması, ictimai təhlükəli nəticələrin baş verməsi təhlükəsi yaradan partlayış, yanğın və ya digər hərəkətlər törətmə, eləcə də həmin məqsədlə bu cür hərəkətlərin törədiləcəyi ilə hədələmədir.
Burada terrorizmlə bağlı bütün anlayışlar öz əksini tapmışdır. Məsələn, qanunda təsbit olunmuşdur ki, terrorçu hər hansı bir formada terror fəaliyyətinin həyata keçirilməsində iştirak edən şəxs, terror qrupu terror fəaliyyətinin həyata keçirilməsi məqsədi ilə iki və daha artıq şəxsin birləşməsi, terror təşkilatı terror fəaliyyətinin həyata keçirilməsi məqsədi ilə yaradılan və ya öz fəaliyyətində terrorçuluqdan istifadəni mümkün hesab edən təşkilatdır. Əgər struktur bölmələrindən biri təşkilatın hər hansı bir rəhbər orqanının razılığı ilə terror fəaliyyəti ilə məşğuldursa, həmin təşkilat terror təşkilatı hesab edilir.
Qanunda, həmçinin göstərilir ki, terrorçuluğa qarşı mübarizə terror fəaliyyətinin aşkar edilməsi, qarşısının alınması, habelə terror nəticəsində dəyə biləcək zərərin minimuma endirilməsi ilə bağlı fəaliyyətdir. Terror əleyhinə aparılan əməliyyatlar terror aksiyalarının qarşısının alınması, fiziki şəxslərin təhlükəsizliyinin təmin edilməsi, terrorçuların tərksilah edilməsi, zərərsizləşdirilməsi, habelə terror aksiyası nəticəsində dəyə biləcək zərərin minimuma endirilməsi üçün həyata keçirilən xüsusi tədbirlər hesab olunur.
Bölmənin digər xəbərləri
