Azərbaycanın baş naziri Artur Rasizadə yenidən Dağıstan Respublikası Dövlət Şurasının sədri seçilmiş Məhəmmədəli Məhəmmədovun vəzifəsinə başlaması münasibətilə təntənəli mərasimdə iştirak etmək üçün iyulun 25-də Mahaçqalaya gəlmişdir. 

Mahaçqala hava limanında respublikamızın baş nazirini Dağıstan hökumətinin sədri Xizri Sıxsəidov, Dövlət Şurasının üzvü Qurban Qurbanov, digər rəsmi şəxslər qarşıladılar. Azərbaycanın baş naziri maşın karvanının müşayiəti ilə Mahaçqala Rus Dram Teatrına gəldi. Burada Dağıstan Respublikası Dövlət Şurası sədrinin andiçmə mərasimi oldu.

Mərasimi giriş sözü ilə Dağıstan Xalq Məclisinin sədri Muxu Əliyev açaraq, Məhəmmədəli Məhəmmədovun Dövlət Şurasının sədri seçilməsi haqqında respublika qanunvericilik orqanının qərarını oxudu və Dağıstan Respublikası ali icra orqanı başçısının vəsiqəsini ona təqdim etdi. O dedi ki, Məhəmmədəli Məhəmmədovun Dövlət Şurasının sədri vəzifəsini icra etməyə başlaması Dağıstan xalqlarının ümumxalq bayramı - Konstitusiya günü ilə bir vaxta düşmüşdür.

Məhəmmədəli Məhəmmədov and içdikdən sonra, Rusiya Prezidenti İcra Aparatının rəhbəri Aleksandr Voloşin Rusiya Federasiyasinin Prezidenti Vladimir Putinin təbrik məktubunu oxudu.

Rusiya hökuməti sədrinin müavini Valentina Matviyenko Məhəmmədəli Məhəmmədovu üçüncü müddətə Dağıstan Dövlət Şurasının sədri vəzifəsinə seçilməsi münasibətilə təbrik edərək, onu Şimali Qafqazda əmin-amanlıq və sabitlik rəmzi adlandırdı.

Sonra söz Azərbaycanın baş naziri Artur Rasizadəyə verildi. O bildirdi ki, dövlətimizin başçısının ona həvalə etdiyi şərəfli vəzifəni yerinə yetirərək, yenidən Dağıstan Respublikası Dövlət Şurasının sədri seçilməsi münasibətilə Məhəmmədəli Məhəmmədova Azərbaycan Prezidenti Heydər Əliyevin səmimi təbrikini və xoş arzularını çatdırır. Baş nazir dedi ki, eyni zamanda, Azərbaycan Respublikasının Prezidenti Dağıstan xalqlarına özünün ən səmimi hisslərini yetirməyi, onlara sülh, firavanlıq, tərəqqi arzuladığını bildirməyi xahiş etmişdir.

Artur Rasizadə bildirdi ki, Azərbaycan və Rusiya özlərinin qarşılıqlı münasibətlərində prinsipcə yeni səhifə açaraq indiki yüzilliyə strateji tərəfdaşlar kimi qədəm qoymuşlar. 2001-ci ilin yanvarında Rusiya Prezidenti Vladimir Putinin respublikamıza rəsmi səfəri və 2002-ci ilin fevralında Azərbaycan Prezidenti Heydər Əliyevin Rusiyaya dövlət səfəri bu müsbət prosesdə əlamətdar hadisələr oldu. Hər iki səfərin yekunlarına əsasən, Azərbaycan-Rusiya münasibətlərinin möhkəmlənməsinə yönəlmiş bir sıra mühüm sənədlər imzalanmışdır.

Baş nazir Rusiya ilə çoxtərəfli əməkdaşlıq çərçivəsində yaxın qonşumuz olan Dağıstan Respublikası ilə əlaqələrin möhkəmləndirilməsi məsələsinə toxunaraq xüsusi vurğuladı ki, Azərbaycan Prezidenti Heydər Əliyevin və Dağıstan Dövlət Şurasının sədri Məhəmmədəli Məhəmmədovun həyata keçirdikləri müdrük, uzaqgörən siyasət Azərbaycan və Dağıstan xalqları arasında əsrlər boyu yaranmış və irsən nəsildən-nəslə ötürülmüş mehriban qonşuluq münasibətlərinin möhkəmlənməsi üçün yaxşı zəmindir. 1996-cı ilin martında Dağıstan rəhbərinin Bakıya səfəri zamanı imzalanmış ticarət-iqtisadi, elmi-texniki və mədəni əməkdaşlıq haqqında hökumətlərarası saziş əməkdaşlığımızın hüquqi bazası oldu və ikitərəfli münasibətləri xeyli fəallaşdırmağa imkan verdi. Bundan əlavə, Azərbaycan ilə Rusiya arasında iqtisadi əməkdaşlığa dair hökumətlərarası komissiyanın 2001-ci ilin aprelində Moskvada keçirilmiş beşinci iclasında Dağıstanla əməkdaşlığa, o cümlədən kənd təsərrüfatı, təhsil və mədəniyyət sahələrində əməkdaşlığa xüsusi diqqət yetirildi. Dağıstan hökumətinin sədri Xizri Şıxsəidov ölkəmizdə olmuş, Azərbaycan Prezidenti ilə görüşmüş, habelə Nazirlər Kabinetində görüşlər keçirmişdir. Bu görüşlərdə ikitərəfli münasibətlərin daha da inkişaf etdirilməsi perspektivləri müzakirə olunmuşdur.

Sonra Artur Rasizadə iqtisadi münasibətlərin uğurlu inkişafını konkret rəqəmlərlə əsaslandıraraq bildirdi ki, 2001-ci ildə Dağıstandan keçən şimal maşrutu ilə 2,5 milyon ton Azərbaycan nefti nəql edilmişdir ki, bu da 2000-ci ildəkindən təxminən 5 dəfə çoxdur. Cari ildə də indəyədək azı 2,5 milyon ton neft nəql edilmişdir.

Azərbaycanın baş naziri bunu da vurğuladı ki, müsbət inteqrasiya prosesləri ilə yanaşı, Qafqaz xalqlarının, o cümlədən Azərbaycan xalqının taleyinə ağır təsir göstərmiş terrorizm, təcavüzkar separatizm, silahlı münaqişələr kimi transmilli xarakter daşıyan çoxlu təhlükə və risklər də mövcuddur. Respublikamızın ərazi bütövlüyü pozulmuşdur, onun 20 faizi Ermənistan silahlı qüvvələrinin işğalı altındadır, təxminən bir milyon vətəndaşımız doğma yerlərindən qovularaq on ildir ki, çadır şəhərciklərində çox ağır şəraitdə yaşayır. Artur Rasizadə dedi: “Əsas vəzifə Qafqazdakı bütün münaqişələri sülh yolu ilə, beynəlxalq hüquq prinsiplərinə və normalarına ciddi əməl olunmaqla həll etməkdən ibarətdir”.

Artur Rasizadə sonra Məhəmmədəli Məhəmmədova Azərbaycan rəssamının çəkdiyi “Baharın gəlişi” tablosunu təqdim etdi.

Mərasimdə Rusiya Federasiyasının bəzi subyektlərinin rəhbərləri də çıxış etdilər. Qaraçay-Çərkəs Respublikasının Prezidenti Vladimir Semyonov dedi: “Azərbaycanın baş nazirinin burada olmasından istifadə edərək, Şimali Qafqaz respublikalarının rəhbərləri adından Azərbaycan Prezidenti çox hörmətli Heydər Əliyevə xüsusi ehtiramımızı bildirmək istəyirəm”.

Səmimi sözlərə görə natiqlərə təşəkkür edən Dağıstan Dövlət Şurasının sədri Məhəmmədəli Məhəmmədov Dağıstana və bu respublikanın xalqlarına yüksək ehtirama görə Azərbaycan Prezidenti Heydər Əliyevə minnətdarlığını bildirdi. Məhəmmədəli Məhəmmədov vəzifəsinin icrasına başlaması münasibətilə təntənəli mərasimdə iştirak etməyi respublikamızın baş nazirinə tapşırmasını dövlətimizin başçısının Dağıstana diqqət və hörmətinin təzahürü adlandırdı.

Təntənəli mərasimin sonunda Dağıstanın incəsənət ustalarının iştirakı ilə konsert oldu.

Sonra baş nazir Artur Rasizadə Dağıstan Respublikasının Konstitusiya günü və Dövlət Şurası sədrinin vəzifəsinin icrasına başlaması münasibətilə təşkil olunmuş ziyafətdə iştirak etdi.

Artur Rasizadə iyulun 25-də axşam Bakıya qayıtdı. Azərbaycan baş nazirini Mahaçqala hava limanında Dağıstan Respublikası Dövlət Şurasının sədri Məhəmmədəli Məhəmmədov, hökumətin sədri Xizri Şıxsəidov, Xalq Məclisinin sədri Muxu Əliyev, Kabarda-Balkar Respublikasının Prezidenti Valeri Kokov yola saldılar.

Oqtay Bayramov

AZƏRTAC-ın xüsusi müxbiri

Mahaçqala-Bakı