SİYASƏT
Azərbaycanın Müstəqillik günü İsraildə geniş qeyd edilmişdir
Bakı, 18 oktyabr (AZƏRTAC). Oktyabr ayında İsrailin müxtəlif şəhərlərində Azərbaycan Günləri böyük uğurla keçmişdir. Bununla əlaqədar tədbirlər həm keçmiş SSRİ-dən İsrailə köçüb gələnlərin, həm də yerli sakinlərin böyük marağına səbəb olmuşdur.
İsrail-Azərbaycan Beynəlxalq Assosiasiyasında (Azİz) AZƏRTAC-a verilən məlumata görə, oktyabrın 14-də ölkənin ən mühüm şəhərlərindən biri, “İsrail vadisinin paytaxtı” sayılan Afulada Azərbaycan günləri keçirilmişdir.
Həmin gün Azərbaycan Respublikasının müstəqilliyinin 22-ci ildönümünə həsr olunmuş bayram şənliklərində iştirak etmək üçün yüzlərlə insan şəhərin mərkəzi mədəniyyət sarayında toplaşmışdı. Xarici işlər və müdafiə məsələləri üzrə parlament komissiyasının sədri, “İsrail bizim evimizdir” partiyasının lideri Aviqdor Liberman və İsrailin daha bir neçə görkəmli siyasətçisi də fəxri qonaqlar arasında olmalı idi. Lakin son məqamda məlum olmuşdur ki, Parlamentin deputatları bu tədbirə gələ bilməyəcəklər, çünki Afulada konsert Knessetin qış sessiyasının rəsmi açılışı ilə eyni vaxtda düşmüşdür.
Buna baxmayaraq, Aviqdor Liberman tədbir iştirakçılarına videomüraciət etməyə vaxt tapmışdı. O, dünya siyasətində respublikamızın rolunun get-gedə artmasını və İsrail-Azərbaycan münasibətlərinin daha da inkişaf etdirilməsinin vacibliyini vurğulamışdır.
Aviqdor Liberman demişdir: “Məlum olduğu kimi, bu gün Azərbaycan dünyanın ən sürətlə inkişaf edən ölkələrindən biridir. Eyni zamanda o, özünün çoxəsrlik tolerantlıq və humanizm ənənələrinə sadiq qalır. İslam dövlətinin inkişafının Azərbaycan xalqının ümummilli lideri Heydər Əliyev tərəfindən işlənib hazırlanmış və onun varislərinin davam etdirdiyi, milli və dini identikliyin qorunub saxlanması, müasir dövrün bütün tələbləri üçün açıqlıq, bütün dünya ilə əməkdaşlığa hazır olmaq kimi xüsusiyyətləri özündə birləşdirən bu model digər müsəlman ölkələrinin liderləri tərəfindən də öyrənilməyə və tətbiq edilməyə layiqdir.
Dünya siyasət meydanında Azərbaycanın getdikcə artan rolunu, çox cəhətdən, məhz bu model şərtləndirir. Azərbaycan ilə İsrail arasında yaranmış səmimi münasibətləri də çox cəhətdən məhz həmin model müəyyən etmişdir”.
Mədəniyyət sarayının foyesində əslən Azərbaycandan olan rəssamların əsərlərinin sərgisi təşkil edilmişdi. Bu əsərlərin çoxuna tamaşa edəndə Azərbaycanın gözəl təbiət və şəhər mənzərələri yada düşür. Foyedə həm də məşhur “Natali” qənnadı firması tərəfindən təqdim olunmuş ənənəvi Şərq şirniyyatının dequstasiyası təşkil edilmişdi.
Bayram konsertinin təşkilatçısı olan “Azİz” Assosiasiyası tədbirin proqramını elə tərtib etmişdi ki, artistlərin çıxışları Azərbaycanın tarixi və bu günü barədə hekayətlərlə, Aviqdor Libermanın videomüraciəti və Azərbaycan Mədəniyyət Mərkəzinin direktoru Yeganə Salmanın çıxışı ilə növbələşirdi. Yeganə Salman “Azİz” Assosiasiyası və əslən Azərbaycandan olan bütün sakinlər adından Prezident İlham Əliyevə təbrikin mətnini oxumuşdur.
Bayram konsertinin iştirakçıları qarşısında İsrail operasının yeni ulduzu Miryam Hacıyeva, Pnina Yaskovun rəhbərliyi ilə “Rəqs edən mirvari” Qafqaz rəqs ansamblı, bütün Qafqaz respublikalarının nümayəndələri arasında populyar olan müğənnilər Orli Abramova, Tomer Əliyev, Liora Safanova, Manuel İsakov, Hava Dolev, habelə Fərid Aloni və Sofa Libermandan ibarət “Bakı-Moskva” dueti çıxış etmişdir.
Zala toplaşanlar Azərbaycanın və Dağıstanın Əməkdar Artisti, məxsusi həmin konsertdə iştirak etmək üçün Bakıdan təyyarə ilə gəlmiş Ədalət Şükürovun çıxışını gurultulu alqışlarla qarşılamışlar.
“Azİz” Assosiasiyasının baş direktoru Lev Spivak demişdir: “Biz istəmişik ki, konsert üçün ayrılmış iki saat yarım müddətində tamaşaçılar Azərbaycan musiqi mədəniyyətinin bütün müxtəlif janrları və onun zəngin tarixi ilə tanış olsunlar; bu mədəniyyətin gözəlliyini və gücünü qiymətləndirsinlər, başa düşsünlər ki, bu gün bütövlükdə dünya mədəniyyətini Azərbaycan mədəniyyətindən ayrı təsəvvür etmək mümkün deyil. Zalın reaksiyasından belə görünür ki, biz bu istəyimizə nail olmuşuq. Tamaşaçıların əksəriyyəti konsertə valeh olduqlarını gizlətmir, konsert başa çatandan sonra hələ uzun müddət dağılışmaq istəmirdi”.
“Azİz” Assosiasiyasının mədəni-kütləvi tədbirlərinin təşkilinə görə cavabdeh nümayəndəsi Şaul Siman Tov onun sözünə qüvvət verərək bildirmişdir ki, təşkil edilən bütün başqa tədbirlərdə də Azərbaycan melodiyaları səslənəndə tamaşaçıların reaksiyası bu cür olmuşdur.
Tədbirin sonunda konsertin aparıcıları - İsrailin “Konteks” teatrının aktrisası Yevgeniya Şarova, müğənni və musiqiçi Rauf Ağalarov “Azİz” Assosiasiyasının bütün təşəbbüslərini dəstəkləyən təşkilatların hamısına - Heydər Əliyev Fonduna, Dağ Yəhudilərinin STMEQİ xeyriyyə fonduna, Azərbaycanın “Caspian Driling Company” neft şirkətinin İsraildəki filialına, Afula şəhər bələdiyyəsinə və digər qurumlara təşəkkürünü bildirmişlər.
İsraildə Azərbaycan günləri davam edir. Yaxın günlərdə Təl-Əvivdə, Rehovotada və ölkənin digər şəhərlərində tədbirlər keçiriləcəkdir.