AZƏRBAYCANIN NATO İLƏ ƏMƏKDAŞLIĞININ İNKİŞAF PERSPEKTİVLƏRİ MÜZAKİRƏ EDİLMİŞDİR
Mayin 3-də Milli Məclis sədrinin müavini Ziyafət Əsgərov NATO-nun informasiya və mətbuat ofisinin mütəxəssisi xanım Despina Asentuili ilə görüşmüşdür.
Səmimilik şəraitində keçən görüşdə parlament sədrinin müavini ölkənin NATO ilə əməkdaşlığının inkişafı məsələsi üzərində ətraflı dayanaraq bildirdi ki, 1994-cü ildən NATO-nun “Sülh naminə tərəfdaşlıq” proqramına qoşulan Azərbaycan bütün tədbirlərdə, o cümlədən bu təşkilatın Parlament Assambleyasının sessiyalarında fəal iştirak edir. 1999-cu ilin mayında Azərbaycan NATO-nun Parlament Assambleyasında daimi müşahidəçi statusu aldıqdan sonra deputatlarımızın və hərbçilərimizin NATO-nun ayrı-ayrı qurumları ilə əlaqələri daha intensiv olmuşdur.
Ziyafət Əsgərov NATO-nun baş katibinin və bu təşkilatın Parlament Assambleyası prezidentinin Bakıya səfərlərinin əhəmiyyətini vurğulayaraq ümidvar olduğunu bildirdi ki, NATO-nun Parlament Assambleyasının yaz sessiyasında Azərbaycanın Şimali Atlantika blokunda assosiativ üzvlüyü məsələsi öz həllini tapacaqdır.
Xanım Despina Asentuili Azərbaycanla NATO arasında münasibətlərin yüksək səviyyədə olması barədə deyilənlərlə razılaşaraq, bu təşkilatın rəhbərliyinin planlaşdırdığı tədbirlər barədə məlumat verdi. Qonaq bildirdi ki, onun səfərindən sonra NATO proqramının rəhbəri Bakıya gələcək və Xəzər dənizinin ekoloji problemlərinə həsr olunmuş konfransda iştirak edəcəkdir. Digər mühüm tədbir cari ilin iyun ayında keçiriləcəkdir. Həmin vaxt Bakıda NATO baş katibinin köməkçisinin iştirakı ilə Şimali Atlantika blokunun Cənubi Qafqaz ölkələri ilə əməkdaşlığı mövzusunda seminar olacaqdır. Bu tədbirdən sonra ölkəmizin paytaxtında NATO-nun informasiya mərkəzi açılacaqdır.
Tərəflər bəzi digər məsələlər, o cümlədən NATO-nun Paris sammitində ölkəmizin iştirakı məsələsi barəsində də fikir mübadiləsi apardılar.
Bölmənin digər xəbərləri
