Azərbaycanlı dizaynerin fotoşəkli “Men’s Health” adlı beynəlxalq jurnalın üz qabığında dərc edilib
Bakı, 30 yanvar, AZƏRTAC
Kişilər üçün nəzərdə tutulan “Men’s Health” beynəlxalq nəşrinin türkcə versiyasının yeni nömrəsi çapdan çıxıb. Bu nömrənin baş qəhrəmanı azərbaycanlı dizayner Rüfət İsmayıldır.
AZƏRTAC Rüfət İsmayılın İnstagram səhifəsinə istinadla xəbər verir ki, Amerikada kişilər üçün nəzərdə tutulan aylıq “Men’s Health” jurnalının lisenziyalı regional versiyaları dünyanın 45 ölkəsində, o cümlədən Türkiyədə nəşr edilir. Jurnalın fevral nömrəsinin qəhrəmanı azərbaycanlı dizayner Rüfət İsmayıl olub.
Qeyd edək ki, Rüfət İsmayıl bu beynəlxalq nəşrin üz qabığında fotosu dərc edilmiş ilk azərbaycanlıdır.
Rüfət İsmayıl ilk və hələlik yeganə azərbaycanlı dizaynerdir ki, onun kolleksiyaları moda aləmində prestijli tədbirlər sayılan İtaliya, Dubay, Türkiyə, İran və Beyrut moda həftələrində nümayiş etdirilib. R. İsmayılın kolleksiyası dünya moda sənayesinin mərkəzi sayılan “Pitti Uomo”da da göstərilib, “Fashion TV” telekanalı isə R. İsmayılı 2018-ci ildə Avropanın ən yaxşı dizayneri hesab edib.
Qeyd edək ki, Nyu-York moda həftəsində Azərbaycanı ilk dəfə təmsil edən məhz Rüfət İsmayıl olub: 2018-ci il sentyabrın 7-də moda həftəsi çərçivəsində Rüfət İsmayıl “Power of fire” adlı kolleksiyasını təqdim edib.
Bölmənin digər xəbərləri
