AZƏRBAYCANLI UŞAQLAR “MOSKVA DOSTLARI QARŞILAYIR” BEYNƏLXALQ FESTİVALINDA İŞTİRAK ETMİŞLƏR
AZƏRTAC-ın xüsusi müxbiri xəbər verir ki, iyunun 3-də M.V.Lomonosov adına Moskva Dövlət Universitetinin Mədəniyyət Mərkəzində “Moskva dostları qarşılayır” Beynəlxalq uşaq yaradıcılığı festivalının bağlanış mərasimi olmuşdur.
Bu, Vladimir Spivakovun Beynəlxalq Xeyriyyə Fondunun dəstəyi ilə təşkil edilən və “Şəfqət vaxtıdır” devizi altında keçirilən gənc istedadların sayca beşinci illik bayram şənliyi idi. Bu dəfə mədəniyyət aksiyasının diqqət mərkəzində uşaq evlərində yaşayan, xəstəxanalarda müalicə alan və xəstəlik üzündən istedadı üzə çıxmayan uşaqlar olmuşdur. Festivalda 51 ölkədən, habelə Rusiyanın 60 regionundan uşaq kollektivləri və solistlər iştirak etmişlər.
Azərbaycanın Rusiya Federasiyasındakı səfiri Polad Bülbüloğlu festival iştirakçılarına və qonaqlara təbrik nitqi ilə müraciət edərək xüsusi vurğulamışdır ki, bu il “Moskva dostları qarşılayır” Beynəlxalq festivalının kiçik yubileyi - beşinci ildönümü qeyd edilir. Lakin bu qısa zaman kəsiyi də planetimizin gələcəyi, onun tərəqqisi və sabitliyinin təminatçısı olacaq müxtəlif ölkələrin uşaqlarının belə görüşlərinin necə vacib olduğunu əyani şəkildə göstərir. P.Bülbüloğlu forumun gənc iştirakçılarını şəfqət elçiləri olmağa, sülhə və gözəlliyə can atmağa çağırmışdır.
Bu incəsənət forumunda Azərbaycanı Dövlət Uşaq Filarmoniyasının yaradıcı qrupu təmsil etmişdir. Gənc artistlərimizin, o cümlədən folklor-etnoqrafiya rəqs kollektivinin, muğam ifaçılarının və xalq çalğı alətləri ansamblının təqdim etdikləri “Dastan” eposu böyük uğur qazanmışdır. Yekun konsertində Almaniyanın, Türkiyənin, Özbəkistanın, habelə Rusiya Federasiyasının müxtəlif regionlarının gənc təmsilçiləri də iştirak etmişlər.
Foyedə görmə qabiliyyəti zəif olan uşaqların rəsm əsərlərindən ibarət sərgi təşkil edilmişdi. Bağlanış mərasiminin bütün iştirakçılarına festivalın diplomantı və laureatı diplomları, qiymətli hədiyyələr təqdim olunmuşdur.
######
Bölmənin digər xəbərləri
