BAKI BƏLƏDİYYƏ TEATRININ BEYNƏLXALQ UĞURLARI
Xalq artisti Amaliya Pənahova AZƏRTAC-ın müxbirinə demişdir ki, İran İslam Respublikasının ölkəmizdəki səfirliyinin mədəniyyət mərkəzinin dəvəti ilə kollektivimiz əvvəlcə oktyabrın 2-dən 7-dək Tehranda keçirilən Birinci Beynəlxalq komediya festivalında iştirak etdi. Festivala dünyanın 12 dövlətinin – ABŞ-ın, Fransanın, İtaliyanın, Pakistanın, Əfqanıstanın, Tacikistanın, Qırğızıstanın, Özbəkistanın və başqa ölkələrin ən tanınmış teatr kollektivləri dəvət almışdılar. Sənət yarışmasında Sabit Rəhmanın “Yalan” komediyasının tamaşasını göstərdik. Komediyada əsas rolları müsahibiniz və xalq artisti Yusif Muxtarov, əməkdar artistlər Azad Şükürov, Gülsabah Quliyeva oynayırdılar. Tamaşa festivalda böyük uğur qazandı. Əsərdə oynayan aktyorlara festivalın diplomu və üzərində ayətullah Xomeyninin əksi olan qızıl medallar təqdim olundu.
Oktyabrın 16-dan 27-dək isə Tehranda keçirilmiş Beynəlxalq teatr festivalının iştirakçısı olduq. Burada Altay Məmmədovun mənim quruluşumda hazırlanmış “Dəli Domrul” əsərini nümayiş etdirdik. Festivalda kollektivimizin 35 sənətçisi iştirak edirdi. Həmin tamaşa Gülüstan vilayətinin Qorqan və Mazandaran vilayətinin Sari şəhərlərində də tamaşaçılara təqdim edildi. Tamaşa böyük uğur qazandı. Aktyorlara diplomlar, qiymətli hədiyyələr təqdim olundu.
Festivaldan sonra Milli Məclisin deputatı Amaliya Pənahova İranın Mədəniyyət Nazirliyinin rəhbərliyi, habelə digər dövlət və hökumət rəsmiləri ilə görüşlər keçirmişdir.
Bölmənin digər xəbərləri
