İrimiqyaslı tədbirləri könüllülərsiz fikirləşmək mümkün deyil. Gülərüzlü azərbaycanlı gənclər arenaya daxil olan həm yerli, həm də xarici vətəndaşları yüksək qonaqpərvərliklə qarşılayır, onların oturacaqlarını tapmasında yaxından kömək edirlər. Bu prosesə təkcə yerli deyil, xarici könüllülər də cəlb olunub.

"Bakı-2015" birinci Avropa Oyunlarının könüllüləri "Alovqoruyanlar" adlanır. Bu ad yarışın ruhunun təbliğində könüllülərin mərkəzi rolunu əks etdirir və eyni zamanda, Odlar Yurdu Azərbaycana olan hörməti, Azərbaycan xalqının həyəcanını və mehribanlığını tərənnüm edir.

Azərbaycanın gənclər və idman naziri Azad Rəhimov bununla bağlı demişdi: “İlk Avropa Oyunlarının könüllü proqramı gənclərin "Bakı-2015" birinci Avropa Oyunlarına qoşulması və beynəlxalq arenada Azərbaycanı dəstəkləməsi üçün gözəl imkan yaradır. Bizim bütün "Alovqoruyanlar"ımız Azərbaycanda mötəbər çoxnövlü idman yarışının keçirilməsi sahəsində daimi irs qoyan proqram sayəsində ölkəmizin tarixindəki bu möhtəşəm anı paylaşacaq və çox mühüm təcrübə qazanacaqlar”.

Oyunlar üçün 16 mindən çox könüllü qeydiyyatdan keçib. Bu günədək 12500 könüllü işlərə cəlb olunub.

X X X

19:34:00

Artıq Bakı Olimpiya Stadionuna tamaşaçıların axını müşahidə olunur. Arenada onları birinci Avropa Oyunlarının rəmzləri - Ceyran və Nar mehribanlıqla salamlayır. Rəmzlər tamaşaçılar tərəfindən hərarətli alqışlarla qarşılanır. Paytaxt sakinləri və şəhərimizin qonaqları Ceyran və Nar ilə xatirə şəkilləri çəkdirir, arena bayram ab-havasını daha da gücləndirirlər.

Qonaqlara Azərbaycanın zəngin irsinə nəzər salmağı təklif edən Ceyran birinci Avropa Oyunlarının mədəniyyət elçisidir. Ceyran qonaqlara Qafqaz dağlarından Xəzər dənizinin sahillərinədək ölkə boyu bələdçilik edəcək və onlara Azərbaycanın gözəlliklərini nümayiş etdirəcək.

Nar günəşi sevən, həyat eşqi və enerji ilə aşıb-daşan meyvə kimi təqdim olunur. Nar yeni idman növlərində iştirak etməyi sevir və buna görə də Avropa Oyunlarına qoşulub. Azərbaycan folklorunda birliyi tərənnüm edən Nar, həmçinin sevgi nişanəsi, uğur mücəssəməsidir. Dahi Nizaminin poeziya dünyasında da qeyd olunur ki, narlar sevginin gücündən paralanır.

X X X

19:21:00

Bakı, 12 iyun, Səxavət Quliyev, AZƏRTAC

Bir neçə saatdan sonra dünyanın diqqəti Odlar Yurdu Azərbaycanın paytaxtı Bakıya yönələcək. Tarixdə ilk dəfə təşkil olunacaq birinci Avropa Oyunlarının təntənəli açılış mərasimi məhz Bakı Olimpiya Stadionunda keçiriləcək. Qitənin 6 mindən artıq idmançısını ağuşuna alacaq 68 minlik tamaşaçı tutumuna malik arenada atletlərlə yanaşı, tamaşaçılar da ilk Avropa Oyunları həyəcanının bir parçasına çevriləcək.

Bakı Olimpiya Stadionun tikintisinə 2011-ci il iyunun 6-da başlanılıb. Təməlqoyma mərasimində Azərbaycan Prezidenti İlham Əliyev, FIFA və UEFA prezidentləri Yozef Blatter və Mişel Platini iştirak ediblər. İlk Avropa Oyunlarının açılış və bağlanış mərasimləri ilə yanaşı, “Bakı-2015”-in proqramına daxil olan atletika yarışları da məhz bu stadionda keçiriləcək.

Müasir arxitektura üslubu, əzəməti ilə seçilən Bakı Olimpiya Stadionu bu tipli idman qurğuları sırasında özünəməxsus yer tutur. Beynəlxalq standartlara tam cavab verən stadionda müxtəlif funksiyalı tribunalar, qaçış zolağı və digər infrastruktur yaradılıb. Təxminən 50 hektar ərazini əhatə edən stadion 6 mərtəbədən ibarətdir. Əsas və köməkçi stadionlardan ibarət olacaq arenada VVIP, VİP, CIP, media, habelə əlil tamaşaçı bölmələri nəzərdə tutulub. Stadionun sahəsinə 4, tribunalara isə 26 qapıdan giriş var. Olimpiya normativlərinə əsasən, 3100 yerlik avtomobil parkı inşa edilib. Stadionun ətrafında ümumilikdə 82 min kvadratmetrlik yaşıllıq sahəsi salınır. Arenanın layihəsi iqtisadi səmərəliliyi, müasirliyi, funksional baxımdan əlverişliliyi, paytaxtın memarlığına və irəli sürülən texniki şərtlərə maksimum uyğunluğu ilə seçilir.