Bakıdakı 2 nömrəli Texniki-Humanitar Liseylə Şuşa məktəbi arasında əməkdaşlıq sazişi imzalanıb
Bakı, 3 noyabr, AZƏRTAC
Bakı Şəhəri üzrə Təhsil İdarəsinin (BŞTİ) təşəbbüsü ilə paytaxtdakı 2 nömrəli Texniki-Humanitar Lisey və Şuşa 1 nömrəli tam orta məktəbi arasında milli-mənəvi dəyərlərin təbliği, mütaliə mədəniyyəti, yazı vərdişlərinin formalaşdırılması istiqamətində birgə fəaliyyəti əks etdirən əməkdaşlıq sazişi imzalanıb. Tədbir Vətən şəhidlərinin əziz xatirəsinin bir dəqiqəlik sükutla yad edilməsi ilə başlayıb.
Bu barədə AZƏRTAC-a BŞTİ-dən məlumat verilib. Bildirilib ki, mərasimdə çıxış edən BŞTİ-nin müdiri Mehriban Vəliyeva 2 nömrəli Texniki-Humanitar Lisey və Şuşa şəhər 1 nömrəli tam orta məktəbi arasında imzalanan əməkdaşlıq sazişini ölkəmizin inzibati və mədəniyyət paytaxtları arasında uğurlu təhsil körpüsü adlandırıb. Qeyd edib ki, bu təşəbbüs Şuşadan uzaqda böyüyən, Vətənin Şuşa adlı cənnətini sadəcə şəkillərdən, lentlərin yaddaşına köçən kadrlardan görən, böyüklərin dilindən eşidən uşaq və gənclərin Bakıdan Şuşaya uzanan mənəvi bağlılığıdır.
İdarə müdiri birgə əməkdaşlıq sazişi çərçivəsində “Yaşıl körpü” ağacəkmə aksiyasında əkilən 44 ağacın Vətən müharibəsi şəhidlərinin xatirəsinə sonsuz minnətdarlığın, vəfa borcunun kiçik bir rəmzi olaraq dəyərləndirib.
Paytaxt məktəblərində mütəmadi olaraq çoxsaylı ekoloji layihələrin həyata keçirildiyini, məktəblilərin ekoloji tərbiyəsinin daim diqqət mərkəzində saxlanıldığını bildirən M.Vəliyeva ekoloji mədəniyyəti, təbiətə olan qayğı hissini təbliğ edən “Yaşıl məktəb” layihəsinin də belə təşəbbüslərdən biri olduğunu qeyd edib.
Tədbirdə çıxış edən Şuşa Rayon Təhsil Şöbəsinin müdiri Təvəkkül Əliyev Azərbaycanda və Cənubi Qafqazda ilk dünyəvi məktəbin 1830-cu ildə məhz Şuşada inşa olunduğunu, işğal dövründə qədim tarixə malik 1 nömrəli tam orta məktəbin də erməni vandalları tərəfindən dağıdıldığını diqqətə çatdırıb. Qeyd edib ki, Prezident İlham Əliyev tərəfindən mayın 12-də Şuşada məktəbin təməlinin qoyulması təhsilə olan ali dəyərin göstəricisidir.
Şuşa Rayon İcra Hakimiyyəti başçısının müavini Vüsalə Fətəliyeva və hər iki məktəbin direktoru bildiriblər ki, böyük əhəmiyyət kəsb edən sazişə uyğun olaraq keçirilməsi nəzərdə tutulan birgə seminar və təlimlər, həmçinin şagirdlərin ümumrespublika və beynəlxalq yarışlara hazırlıqlarına kömək göstərmək, kitabxana və muzey imkanlarından qarşılıqlı istifadə və digər birgə fəaliyyət qarşılıqlı təcrübə mübadiləsinə, şagirdlərin uğurlu nəticələr əldə etmələrinə öz töhfəsini verəcək.
Sonra tədbir iştirakçıları məktəbin həyətində Vətən müharibəsi şəhidlərinin xatirəsinə 44 ağac əkiblər.
Bölmənin digər xəbərləri
