Balakəndə quru tütün istehsalı 2 dəfə artıb
Balakən, 5 fevral, Mustafa Dadaşov, AZƏRTAC
İqtisadiyyatının əsasını kənd təsərrüfatı məhsulları istehsalı təşkil edən Balakən rayonunda 2018-ci ildə mövcud iqtisadi potensialdan səmərəli istifadə olunması, ixracyönümlü sahələrin inkişaf etdirilməsi diqqət mərkəzində saxlanılıb. Belə ki, ötən il rayonda 535 hektar sahədə tütün əkilib, 643 ton quru tütün istehsal edilib. Tütün istehsalı əvvəlki illə müqayisədə 2 dəfə artıb. Tütün istehsalının artmasına ötən il rayonun Hənifə kəndində yeni istifadəyə verilən 60 kameralı qurutma məntəqəsinin tam gücü ilə işləməsi böyük təsir göstərib. Məntəqə ötən mövsümdə fermerlərdən 2823 ton yaşıl tütün kütləsi qəbul edib və emal prosesindən sonra burada 392 ton quru tütün istehsal olunub. Emal məntəqəsində 20 nəfər daimi, 75 nəfər isə mövsümi işlə təmin edilib.
AZƏRTAC-ın bölgə müxbiri xəbər verir ki, bu barədə fevralın 5-də Balakəndə 2018-ci ilin sosial-iqtisadi inkişafının yekunları və qarşıda duran vəzifələrə həsr olunan müşavirədə məlumat verilib.
Tədbir iştirakçıları əvvəlcə rayonda istehsal olunan sənaye və kənd təsərrüfatı məhsullarının, sənətkarların əl işlərindən ibarət sərgilərə baxıblar.
Rayon icra hakimiyyətinin başçısı İslam Rzayevin hesabat məruzəsində bildirilib ki, 2018-ci ildə Balakən rayonunda ümumi məhsul buraxılışının həcmi əvvəlki illə müqayisədə 1,2 faiz artaraq 197 milyon manat olub. Hesabat dövründə rayonda 73 milyon manat dəyərində kənd təsərrüfatı və 26,5 milyon manatlıq sənaye məhsulları istehsal edilib, 21,2 milyon manatlıq tikinti işləri görülüb. Aqrar sahədə məhsul istehsalı 2017-ci illə müqayisədə 4,9 faiz, sənaye məhsulu istehsalı isə 3,5 dəfə artıb.
2018-ci ildə Balakən rayonunda kənd təsərrüfatının ənənəvi sahələrindən olan baramaçılığın, fındıqçılığın inkişaf etdirilməsi istiqamətində davamlı işlər aparılıb. Ötənilki mövsümdə rayonda 29,8 ton yaş barama istehsal edilərək proqnoz tapşırığa 130,3 faiz əməl olunub. Fındıq bağlarından 6,2 min ton məhsul tədarük edilib. Fındıq istehsalı əvvəlki illə müqayisədə 900 ton və ya 17 faiz artıb. Rayonda 1010 hektar sahədə yeni fındıq bağları salınaraq mövcud bağların sahəsi 9944 hektara çatdırılıb. 2019-cu ildə daha 700 hektar sahədə yeni fındıq bağlarının salınması planlaşdırılır.
Diqqətə çatdırılıb ki, 2018-ci ildə rayonda heyvandarlıq məhsulları istehsalının artırılması, mal-qaranın cins tərkibinin və yem bazasının yaxşılaşdırılması sahəsində zəruri tədbirlər görülüb. Hesabat ilində rayonda 5 min 48 ton ət, 21 min ton süd, 9,6 milyon ədəd yumurta, 94 ton bal istehsal olunub. Əvvəlki illə müqayisədə ət istehsalı 6 faiz, süd istehsalı 1,3 faiz, yumurta istehsalı 4,2 faiz, bal istehsalı isə 2,3 dəfə artıb.
2018-ci ildə Balakən 2 saylı regional “ABAD” Mərkəzi ilə əməkdaşlıq edən ailələrin sayı artaraq 24-ə çatıb. Onlardan 13-ü qida istehsalı, 11-i isə dekorativ-tətbiqi xalq sənətkarlığı sahəsində fəaliyyət göstərir. “ABAD”çıların istehsal etdikləri 3 növ pendir, 2 növ kolbasa, 21 növ mürəbbə və cem məhsulları Bakı şəhərinin iri ticarət şəbəkələrində satışa çıxarılıb.
Məruzədə 2018-ci ildə rayonda həyata keçirilən tikinti-təmir işləri barədə də məlumat verilib. Bildirilib ki, hesabat ilində Şərif kəndində 360 şagird yerlik məktəb binası tikilib istifadəyə verilib, Uşaq İncəsənət Məktəbi üçün 320 şagird yerlik yeni binanın tikintisi başa çatdırılıb. Yevlax-Zaqatala-Gürcüstan dövlət sərhədi avtomobil yolunun ümumi uzunluğu 29 kilometr olan Balakən-Mazımçay hissəsinin tikintisi davam etdirilib. Balakən şəhərində “ASAN xidmət” mərkəzinin inzibati binasının tikintisinə başlanılıb.
Müşavirədə, həmçinin 2018-ci ildə əhalinin elektrik enerjisi, təbii qaz və içməli su ilə təminatının yaxşılaşdırılması, vətəndaşların qəbulu, onların ərizə və şikayətlərinə baxılması sahəsində görülən işlər ətraflı təhlil olunub, qarşıda duran vəzifələrdən bəhs edilib.
Azərbaycan Respublikasının Prezidenti Administrasiyasının məsul işçisi Rüfət Əliyev, Milli Məclisin deputatları Kamilə Əliyeva, Nəsib Məhəməliyev çıxış edərək, 2018-ci ildə respublikada sosial-iqtisadi sahədə qazanılan uğurlardan danışıb, tövsiyələrini bildiriblər.
Müşavirənin sonunda Prezident İlham Əliyevin 2018-ci il 25 dekabr tarixli Sərəncamı ilə kənd təsərrüfatının inkişafındakı xidmətlərinə görə 3-cü dərəcəli “Əmək” ordeni ilə təltif olunan fermer İmran Cumayevə orden təqdim olunub.
Bölmənin digər xəbərləri
