“BANK RESPUBLİKA” ƏMANƏTÇİLƏR ARASINDA NÖVBƏTİ AYLIQ UDUŞ KAMPANİYASI KEÇİRMİŞDİR
“Bank Respublika” əmanətçilər arasında növbəti aylıq uduş kampaniyası keçirmişdir. Yeddi əmanətçi müxtəlif mükafatlar udmuşdur.
Bankın iki əmanətçisinin hər biri 1000 dollar məbləğində pul mükafatı qazanmışdır. Bankdan AZƏRTAC-ın müxbirinə bildirmişlər ki, əlavə mükafat udan daha beş əmanətçi öz istəyinə görə mobil telefon, rəqəmsal fotoaparat, DVD pleyer, qol saatı və ya iPod musiqi pleyeri seçə bilər.
Kampaniyada bankın azı 6 ay müddətinə 1000 AZN/USD/AUR məbləğində əmanət qoymuş müştəriləri iştirak edirlər. Hər 1000 AZN/USD/AUR məbləğində əmanətə ayda bir uduş şansı düşür. Təsdiq olunmuş şərtlərə görə bank əməkdaşlarının və səhmdarların əmanətləri kampaniyada iştirak etmir.
İndiyədək “Bank Respublika”nın 68 əmanətçisi hər biri 1000 dollar məbləğində mükafat udmuşdur. Daha 80 əmanətçi əlavə mükafatlar almışdır.
Bankın əmanətçiləri əmanətin məbləğindən və müddətindən asılı olaraq 45 günədək kredit xətti olan MasterCard və VISA kartları ala, “Home Banking” xidmətindən istifadə edə, bankın hesabına tibbi sığorta və güzəştli şərtlərlə kredit ala bilərlər. Bank əmanətlərin məbləğinə məhdudiyyət qoymur və müştərilərə əmanət şərtlərini seçmək imkanı verir.
“Bank Respublika” Əmanətlərin Sığortalanması Fondunun üzvüdür. Əhalinin bankda yerləşdirilmiş əmanətləri fondun şərtlərinə əsasən sığortalanır.
