SİYASƏT
BAŞ PROKURORLUĞUN MƏTBUAT XİDMƏTİNİN MƏLUMATI
Azərbaycan Respublikasının baş prokuroru Zakir Qaralov Amerika Birləşmiş Ştatlarının ölkəmizdəki fövqəladə və səlahiyyətli səfiri cənab Ross Uilsonu qəbul etmişdir.
Qonağı səmimi salamlayan baş prokuror respublikamızda hüquq qaydalarının möhkəmləndirilməsi və cinayətkarlıqla mübarizə sahəsində vəziyyətdən danışmış, sabitliyin təmini üçün imkanların yetərincə olduğunu bildirmiş, insan və vətəndaş hüquq və azadlıqlarının qorunması ilə bağlı məsələyə də toxunaraq, möhtərəm Prezidentimiz cənab Heydər Əliyevin rəhbərliyi ilə bu istiqamətdə əldə olunan nailiyyətlər barədə açıqlama vermişdir.
Cənab Ross Uilson səmimi qəbul və ölkədəki vəziyyət barədə ətraflı məlumat üçün minnətdarlıq etmiş, görüşün məqsədinin 907-ci düzəlişin qüvvəsinin dayandırılmasından sonra ABŞ hökumətinin Azərbaycana yardımı proqramının müzakirəsi olduğunu qeyd etmişdir. Görüşdə daha sonra vurğulanmışdır ki, hələ 907-ci düzəlişin qüvvədə olduğu müddət ərzində ABŞ Azərbaycana yardım göstərmək niyyətində olmuş və bu sahədə xeyli işlər görülmüşdür. Həmin fəaliyyətin davamı kimi, təhlükəsizlik və iqtisadi sahələrdə göstəriləcək yardımların daxil olması barədə də məlumat verilmiş, prokurorluq orqanları üçün zəruri olan yardımın xüsusiyyəti və əhəmiyyəti ilə əlaqədar fikir mübadiləsi aparılmışdır.