“BASF Azərbaycan” koronavirusla mübarizə üçün Bakı Şəhər İcra Hakimiyyətinə dezinfeksiyaedici vasitələr bağışlayıb
Bakı, 7 may, Ətrabə Rzayeva, AZƏRTAC
Almaniyanın kimya nəhəngi “BASF” Türkiyədəki sənaye müəssisələrində istehsal etdiyi səth təmizləyici vasitələri, şəhərlərdəki daxili və xarici sahələrin təmizlənməsi üçün məhlulları Bakı Şəhər İcra Hakimiyyətinin (BŞİH) hədiyyə edib. Bu nəcib iş Türkiyənin Azərbaycandakı səfiri Erkan Özoralın dəstəyi ilə həyata keçirilib.
“BASF Azərbaycan”dan AZƏRTAC-a bildirilib ki, hədiyyə olunan dezinfeksiya materialları BŞİH-nin Mənzil-Kommunal Təsərrüfatı Departamenti Sanitariya və Texniki Təmizlik İdarəsinə təhvil verilib.
“BASF” koronavirusla qətiyyətli və uğurla mübarizə aparan Azərbaycan hökumətinin əhalinin sağlamlığı naminə fəaliyyətini dəstəkləyir. Pandemiya dövründə insanların sağlamlığının qorunmasında şəxslərin və qurumların töhfələri də böyük əhəmiyyət daşır. Bu məsuliyyəti dərk edərək “BASF” ətraf mühitə zərər verməyən, ümumi sahələrin təmizliyini təmin edən dezinfeksiya məhsulların istehsalını artıraraq xalqın sağlamlığına töhfə verir.
"Düşünürük ki, COVID-19-la mübarizədə qalib çıxmaq üçün biz hamımız həmrəylik göstərməliyik. Korporativ sosial məsuliyyətə uyğun olan addımlar “BASF” şirkətinin diqqət etdiyi ən önəmli məqamlardan biridir”, - deyə “BASF Azərbaycan” şirkətinin icraçı direktoru Tolqa Baysinop deyib.
O xatırladıb ki, 2006-cı ildən Azərbaycanda fəaliyyət göstərən “BASF” şirkəti bu il 10 faiz alman kapitalı ilə “BASF Azərbaycan” MMC-ni qurub. “BASF Azərbaycan” kənd təsərrüfatı və neft-kimya sənayesi, qida, avtomobil, toxuculuq və digər bu kimi bütün sahələrə xammal və ticari məhsul tədarük etməkdədir. Şirkət Azərbaycan sənayesinin neft və qeyri-neft sektorlarındakı inkişafına öz yüksəkkeyfiyyətli məhsulları ilə töhfəsini verməkdədir.
Bölmənin digər xəbərləri
