“Qəhrəmanlıq Zirvəsi” kitabının təqdimatı olub VİDEO
Bakı, 10 iyun, AZƏRTAC
Modern İnkişaf və Ailə İctimai Birliyinin sədri, ictimai-siyasi xadim, publisist Zərifə Quliyevanın şəhid və qazilərə həsr olunan “Qəhrəmanlıq Zirvəsi” kitabının təqdimat mərasimi keçirilib.
AZƏRTAC xəbər verir ki, Müharibə, Əmək və Silahlı Qüvvələr Veteranları Təşkilatında Modern İnkişaf və Ailə İctimai Birliyinin təşkilatçılığı ilə keçirilən və 15 İyun – Milli Qurtuluş Gününə həsr olunan tədbirdə Milli Məclisin deputatları, ictimai-siyasi xadimlər, ziyalılar, şəhid ailələri, qazilər, veteranlar və ictimaiyyət nümayəndələri iştirak ediblər.
Mərasim Azərbaycanın Dövlət Himninin səsləndirilməsi ilə başlayıb. Azərbaycanın müstəqilliyi, suverenliyi və ərazi bütövlüyü uğrunda canından keçən şəhidlərin əziz xatirəsi bir dəqiqəlik sükutla yad edilib. Daha sonra Ulu Öndər Heydər Əliyevin həyat və dövlətçilik fəaliyyətinə həsr olunan videoçarx nümayiş etdirilib.
Tədbirdə sözləri Zərifə Quliyevaya aid olan “Bayraq” şeiri əsasında hazırlanmış musiqi nömrəsi səsləndirilib. Musiqi nömrəsində Azərbaycan Bayrağının müqəddəsliyi, dövlətçiliyimizin ucalığı, şəhidlərin əmanəti və xalqımızın qalibiyyət ruhu ifadə olunub.
Açılış nitqi ilə çıxış edən Modern İnkişaf və Ailə İctimai Birliyinin sədri, kitabın müəllifi Zərifə Quliyeva bildirib ki, “Qəhrəmanlıq Zirvəsi” kitabı Vətən yolunda canından keçən şəhidlərin əziz xatirəsinə, torpaq uğrunda sağlamlığını fəda edən qazilərin qəhrəmanlıq yoluna və Azərbaycan xalqının milli yaddaşında əbədi yaşayan fədakarlıq salnaməsinə ehtiramdan doğub.
Zərifə Quliyeva qeyd edib ki, Milli Qurtuluş Günü Azərbaycan tarixində xalqın xilası, dövlətçiliyin qorunması və müstəqil ölkəmizin gələcək inkişaf yolunun müəyyənləşməsi baxımından mühüm tarixi gündür. Ulu Öndər Heydər Əliyevin siyasi uzaqgörənliyi, xalq qarşısında misilsiz xidmətləri və dövlətçilik irsi bu gün qalib Azərbaycanın ideya əsasını təşkil edir.
Çıxışlarda bildirilib ki, Ulu Öndər Heydər Əliyevin müəyyən etdiyi siyasi kurs Prezident İlham Əliyevin rəhbərliyi ilə uğurla davam etdirilir, Azərbaycan ərazi bütövlüyünü və suverenliyini tam bərpa edərək tarixinin ən şanlı səhifələrindən birini yazıb. Vurğulanıb ki, bu Zəfərin təməlində xalq-ordu birliyi, güclü liderlik, şəhidlərin fədakarlığı və qazilərin rəşadəti dayanır.
Təqdimat mərasimində Milli Məclisin deputatı Vüqar İskəndərov, Vətən Müharibəsi Qəhrəmanı, mayor Zaur Hüseynov, fəlsəfə elmləri doktoru, professor Rəna Mirzəzadə, filologiya üzrə fəlsəfə doktoru, dosent, yazıçı-publisist Şərəf Cəlilli, Azərbaycan Deflimpiya Komitəsinin baş katibi Namiq Novruzov, Azərbaycan Milli Elmlər Akademiyasının (AMEA) müxbir üzvü, tibb elmləri doktoru,Türk Ağsaqqalları Birliyinin sədri, professor Sudeyf İmamverdiyev, Müharibə, Əmək və Silahlı Qüvvələr Veteranları Təşkilatının sədri, polkovnik Cəlil Xəlilov və digər qonaqlar çıxış ediblər.
Onlar “Qəhrəmanlıq Zirvəsi” kitabını şəhidlərin müqəddəs xatirəsinin yaşadılması, qazilərin döyüş yolunun gələcək nəsillərə çatdırılması, gənclərin vətənpərvərlik ruhunda tərbiyəsi və milli yaddaşın qorunması baxımından dəyərli nəşr kimi qiymətləndiriblər. Bildirilib ki, bu kimi kitablar təkcə tarixi hadisələri əks etdirmir, həm də Vətənə sədaqət, dövlətə bağlılıq və qəhrəmanlıq ruhunu cəmiyyətə aşılayır.
Tədbirdə şəhid ailələrinə və qazilərə göstərilən dövlət qayğısından da bəhs olunub. Qeyd edilib ki, şəhid adı Azərbaycan xalqı üçün ən uca mənəvi zirvələrdən biridir. Qazilərin rəşadəti isə Zəfər tariximizin canlı salnaməsi kimi daim böyük ehtiramla xatırlanır.
Şəhid anası Lətifə xanım çıxışında şəhid ailələrinə göstərilən diqqətə görə minnətdarlığını bildirib, şəhidlərin əziz xatirəsinin yaşadılmasının hər bir azərbaycanlının mənəvi borcu olduğunu vurğulayıb.
Vətən Müharibəsi Qəhrəmanı, mayor Zaur Hüseynov və qazi Ramin bəy çıxışlarında Azərbaycan əsgərinin döyüş meydanında göstərdiyi rəşadətdən, şəhidlərin qəhrəmanlıq yolundan və qazilərin Vətən qarşısındakı şərəfli xidmətindən danışıblar.
Mərasimin kövrək anlarından biri şəhid polkovnik Babək Səmidlinin övladı Mətləb Səmidlinin çıxışı olub. Onun çıxışı iştirakçılar tərəfindən böyük təsir və ehtiramla qarşılanıb.
Sonda “Qəhrəmanlıq Zirvəsi” kitabının müəllifi Zərifə Quliyevaya təşəkkür ifadə olunub, belə nəşrlərin şəhidlərin və qazilərin həyat yolunun təbliği, qəhrəmanlıq nümunələrinin gənc nəslə çatdırılması baxımından mühüm əhəmiyyət daşıdığı vurğulanıb.
Bölmənin digər xəbərləri
