SİYASƏT
BƏƏ-dəki “Azərbaycan” Cəmiyyətinin sədri Dubayın Turizm və Ticarət Marketinqi Nazirliyində olmuşdur
Bakı, 20 aprel (AZƏRTAC). Birləşmiş Ərəb Əmirliklərində fəaliyyət göstərən “Azərbaycan” Cəmiyyətinin sədri Samir İmanov mayda Bakıda “Eurovision-2012” beynəlxalq mahnı müsabiqəsinin keçirilməsi ilə əlaqədar Dubayın turizm və ticarət marketinqi nazirinin müavinləri Nəbil Əbdürrəhman Əhməd və Bədr Abdullah Məhəmməd ilə görüşmüşdür.
Diasporla İş üzrə Dövlət Komitəsindən AZƏRTAC-a bildirmişlər ki, görüşdə Azərbaycanda keçiriləcək müsabiqə haqqında ətraflı məlumat verən S.İmanov ölkəmizdə bu mahnı yarışmasına hazırlıq işlərinin başa çatdığını, “Baku Crystal Hall”un artıq istismara verildiyini bildirmişdir. O, eyni zamanda, müsabiqənin yüksək səviyyədə keçirilməsi üçün Heydər Əliyev Fondunun gördüyü işlər, eləcə də Təşkilat Komitəsinin sədri, Azərbaycanın birinci xanımı Mehriban Əliyevanın bu işlərə göstərdiyi xüsusi diqqət və qayğı barədə nazir müavinlərinə ətraflı məlumat vermişdir.
N.Əbdürrəhman Əhməd “Azərbaycan” Cəmiyyətinin sədrinə ötən ilin oktyabrında keçirilmiş görüşdən sonra nazirliyin apardığı təbliğat işləri sayəsində BƏƏ-dən Azərbaycana turist axınının əvvəlki illərə nisbətən artdığını bildirmişdir.
S.İmanov 2011-ci ilin ölkəmizdə “Turizm ili” elan olunduğunu xatırlatmış, Azərbaycan hökumətinin turizmin inkişaf etdirilməsini prioritet sahələrdən biri kimi müəyyən etdiyini demişdir. Ötən ildə Azərbaycana gələn turistlərin sayının iki milyondan artıq olduğunu qeyd edən S.İmanov, son bir ildə Bakıda 7 beşulduzlu otelin tikildiyini vurğulamışdır. Cəmiyyətin sədri Azərbaycanın turizm sahəsində artan imkanlarının bundan sonra da Dubay və digər əmirliklərdə təbliğ olunması məsələsini razılaşdırmış, Turizm və Ticarət Marketinqi Nazirliyinin rəhbərliyinə Azərbaycan Respublikası Diasporla İş üzrə Dövlət Komitəsi tərəfindən təqdim olunan “Eurovision- 2012” müsabiqəsi ilə bağlı jurnallar, təqvimlər, eyni zamanda, xalqımızın ümummilli lideri Heydər Əliyev haqqında ərəb dilində nəşr olunmuş kitab və ölkəmizin turizm potensialını, zəngin mətbəxini əks etdirən çoxlu sayda broşür, bülleten və s. hədiyyə etmişdir.
Dubayın Turizm və Ticarət Marketinqi Nazirliyinin rəhbərliyi görüşdən məmnun qaldığını, Azərbaycan turizm potensialını yüksək səviyyədə və müxtəlif vasitələrlə Dubayda təbliğ etdirəcəklərini bildirmişlər. S.İmanova ətraflı məlumata və təqdim olunan faydalı nəşrlərə görə təşəkkürlərini bildirən nazir müavinləri bu kimi görüşlərin mütəmadi keçirilməsində maraqlı olduqlarını qeyd etmişlər.
Aprelin 12-də Bakıda keçirilmiş “AİTF-2012” XI Azərbaycan Beynəlxalq turizm və səyahətlər sərgisi barədə də məlumatlı olduqlarını qeyd edən nazir müavinləri Dubayın bir neçə şirkətinin də bu tədbirə qatılmasını tərəflər arasındakı görüşlərin və əməkdaşlığın müsbət nəticəsi kimi qiymətləndirilmişlər.