SİYASƏT
Beş il əvvəl Azərbaycan xalqı Prezident İlham Əliyevə səs verməklə həm də islahatlara “hə” dedi
Bakı, 12 aprel, AZƏRTAC
Aprelin 11-də dövlətimizin başçısı İlham Əliyevin yenidən Azərbaycan Respublikasının Prezidenti seçilməsinin 5 ili tamam oldu. 2018-ci il aprelin 11-də keçirilən növbədənkənar prezident seçkilərində Prezident İlham Əliyev səslərin 86,02 faizini toplayaraq inamlı qələbə qazandı. Tarixi hadisələrlə, dinamik sosial-iqtisadi inkişafla səciyyəvi olan ötən beş il seçicilərin öz seçimində yanılmadığını göstərdi. Ötən müddət ərzində ölkəmiz yeni inkişaf mərhələsinə qədəm qoydu. Respublikamızda böyük islahatlara start verildi, dayanıqlı, çevik iqtisadi layihələrin təməli atıldı. Ötən müddət ərzində Azərbaycan böyük inkişaf yolu keçib, beynəlxalq aləmdə nüfuzunu daha da artıraraq iqtisadi cəhətdən güclü, qüdrətli dövlətə çevrilib, milli maraqlar dövlət siyasətinin prioritetinə çevrilib.
Bu fikirləri AZƏRTAC-a açıqlamasında Milli Məclisin deputatı, professor Kamilə Əliyeva söyləyib.
Deputat bildirib ki, Prezident İlham Əliyevin rəhbərliyi ilə 2003-2018-ci illərdə BMT, Avropa Şurası, NATO və bir sıra nüfuzlu beynəlxalq təşkilatlarda Azərbaycanın irəli sürdüyü təkliflər böyük rəğbətlə qarşılanıb və qəbul edilib.
Onun sözlərinə görə, dövlətimizin başçısının "Ancaq güclü iqtisadiyyatı olan ölkələr müstəqil siyasət apara bilər" fikri hər zaman öz təsdiqini tapıb. 2003-2018-ci illərdə Azərbaycan iqtisadiyyatı dünyada rast gəlinməyən sürətlə inkişaf edib. Ölkədə ümumi daxili məhsul 3,2 faiz, büdcə gəlirləri isə 13,5 dəfə artıb. İqtisadiyyatın bütün sahələrində yüksək artım qeydə alınıb və 2 milyona yaxın yeni iş yeri açılıb. Azərbaycanda böyük infrastruktur layihələri həyata keçirilib və ölkəmiz elektrik enerjisi idxal edən ölkədən ixrac edən ölkəyə çevrilib. Azərbaycan Prezidentinin həyata keçirdiyi uğurlu islahatlar nəticəsində ölkəmiz dünyada ən çox islahat aparan 10 ölkədən biri olub.
“Ötən 5 il ərzində Azərbaycanda neft-qaz sektorunda böyük layihələrin icrası başa çatdırılıb və beynəlxalq əhəmiyyətli yeni layihələrin təməli qoyulub. 2018-ci ildə Cənub Qaz Dəhlizi və onun tərkib hissəsi olan TANAP qaz boru xəttinin açılışı oldu. Həyata keçirilmiş bu uğurlu layihələrin nəticəsində bu gün Azərbaycan Avropanın enerji təhlükəsizliyində böyük rol oynayır. 2014-2015-ci illərdə dünyada neftin qiymətinin 3 dəfəyə qədər azalması və 2020-ci ilin əvvəllərindən başlamış pandemiya böhranından bir çox ölkələr əziyyət çəksə də, Azərbaycanda iqtisadi sabitlik qorunub saxlanıldı. Qeyri-neft sektoru, sənaye və kənd təsərrüfatı məhsullarının istehsalı artdı. Azərbaycanda səhiyyə, təhsil sistemində də böyük nailiyyətlər əldə olunub. Bu gün Prezident İlham Əliyevin rəhbərliyi ilə Azərbaycan siyasi və iqtisadi sahələrdə dünyanın güc mərkəzinə çevrilib”, - deyə K.Əliyeva qeyd edib.
Deputat bildirib ki, Azərbaycan xalqı Prezident İlham Əliyevə səs verməklə həm də demokratik dəyişikliklərə və islahatlar kursuna “hə” dedi. “Ən əsası isə aparılan uzaqgörən siyasət və mükəmməl sosial-iqtisadi bünövrə ölkənin hərbi qüdrətini artırmağa imkan yaratdı. Otuz il işğal altında olan torpaqlarımızı məhz bu qüdrət sayəsində geri qaytara bildik, ərazi bütövlüyümüz təmin olundu. Müharibənin ilk günlərindən xalqımız öz Prezidentinə, Ordusuna güvəndi və onların ətrafında “dəmir yumruq” kimi birləşdi.
Azərbaycan 44 günlük Vətən müharibəsində Zəfərdən sonra regionda yeni reallıqlar yaradıb. Respublikamızın yaratdığı reallıqlar beynəlxalq müstəvidə qəbul olunur və dəstəklənir”, - deyə Kamilə Əliyeva vurğulayıb.