AZƏRTAC xəbər verir ki, Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın təşəbbüsü ilə Bakıda keçirilən “Mədəniyyətlərarası dialoqda qadınların rolunun genişləndirilməsi” mövzusunda beynəlxalq forumun iştirakçılarının bir qrupu iyunun 12-də Bakının görməli yerləri ilə tanış olmuşlar.

Qız qalasından başlanan gəzinti İçərişəhərlə tanışlıqla davam etmişdir. “İşərişəhər” Dövlət Tarix-Memarlıq Qoruğu İdarəsinin rəisi Kamran İmanov Azərbaycan Prezidentinin Sərəncamı ilə yaradılan idarə haqqında qonaqlara məlumat verdi, ötən əsrlərin yadigarı olan abidələrin qorunması və bərpasına göstərilən dövlət qayğısından danışdı.

Karvansara ilə tanışlıqdan sonra qonaqlar tanınmış xalça ustası, xalq rəssamı Kamil Əliyevin xalça muzeyində oldular.

Müxtəlif çeşnili xalçalara maraqla tamaşa edən qonaqlar burada gördüklərindən məmnun qaldılar. Onlara Azərbaycan xalqının qədim el sənətlərindən biri olan xalçaçılıq haqqında məlumat verildi. Muzeydə Heydər Əliyev, Atatürk, Nizami, Füzuli, Nəsimi, Aleksandr Puşkin və başqa görkəmli şəxsiyyətlərin portretləri toxunmuş xalçalar qonaqlarda xüsusi maraq doğurdu.

Daha sonra forum iştirakçıları Miniatür kitab muzeyinə gəldilər. Dünyada yeganə olan bu muzeyin təsisçisi və qurucusu Zərifə Salahova burada toplanmış nadir nüsxələr barədə qonaqlara ətraflı məlumat verdi. 2002-ci il aprelin 23-də açılmış muzeydə dünyanın 62 ölkəsində çap edilmiş, mövzu etibarı ilə olduqca rəngarəng 6 mindən çox kitabın toplandığı və ekspozisiya zalında 35 vitrində 4181 miniatür kitabın nümayiş edildiyi bildirilmişdir. Muzeydə bədii və siyasi ədəbiyyatla yanaşı, Quran, Bibliya kitabları, Azərbaycan və xarici ölkə yazıçılarının yubiley nəşrləri də xüsusi yer tutur.

Buradan qonaqlar Şirvanşahlar sarayına gəlmişlər. Bildirilmişdir ki, İçərişəhərin ən hündür yerindəki bu saray Bakının Şirvanşahlar dövlətinin paytaxtına çevrilməsi ilə əlaqədar inşa olunmuşdur. Kompleksə daxil olan Key-Qubad məscidi, Seyid Yəhya Bakuvi türbəsi və digər memarlıq inciləri qonaqlarda xoş təəssürat doğurmuşdur. Burada onlara xatirə hədiyyələri təqdim olunmuşdur.

Daha sonra forum iştirakçıları Milli Azərbaycan Tarixi Muzeyinə gəlmişlər. 1920-ci ildə yaradılmış muzeydə qədim dövrdən başlayaraq, Azərbaycan tarixinin bütün mərhələlərinə dair 300 mindən çox eksponat toplanmışdır. 1895-1897-ci illərdə tikilmiş və Bakının memarlıq incilərindən sayılan bu bina Azərbaycan milyonçusu, məşhur xeyriyyəçi Hacı Zeynalabdin Tağıyevin mülkü olmuşdur.

Azərbaycan xalqının qədim məişət əşyaları qonaqlarda xüsusi maraq doğurmuşdur. Muzeydə xalqımızın bir çox görkəmli şəxsiyyətlərinin Avropada təhsil almasına yardımçı olmuş Hacı Zeynalabdin Tağıyevin həyatı və fəaliyyətinə dair fotoşəkillər, tarixi sənədlər, ona məxsus qiymətli əşyalar da toplanmışdır.

Altı saatadək davam edən gəzinti qonaqlarda xoş təəssürat oyatmışdır.

######