Beynəlxalq müsabiqənin qalibi olmuş məktəblilər FHN-də mükafatlandırılıb
Bakı, 30 mart, AZƏRTAC
“Fəlakəti gözlərimlə gördüm” adlı uşaq rəsmlərinin beynəlxalq incəsənət müsabiqəsində yer tutmuş azərbaycanlı məktəblilərin Fövqəladə Hallar Nazirliyində (FHN) mükafatlandırma mərasimi keçirilib.
FHN-dən AZƏRTAC-a bildiriblər ki, Bolqarıstanın Daxili İşlər Nazirliyi tərəfindən təşkil olunmuş beynəlxalq müsabiqəyə göndərilən işlər arasında Azərbaycan Milli Konservatoriyasının tərkibində incəsənət gimnaziyasının altıncı sinif şagirdi Finarə Nəzərovanın rəsm işi Qran-Pri mükafatına, 3 nömrəli Uşaq-Gənclər İnkişaf Mərkəzinin dərnək üzvü Fidan Kəbirlinskayaya məxsus rəsm isə birinci yerə layiq görülüb.
Mərasimdə həmin məktəblilərə Bolqarıstanın Daxili İşlər Nazirliyi tərəfindən göndərilmiş fəxri fərman və hədiyyələr, eyni zamanda, FHN-in qiymətli hədiyyələri təqdim olunub. Fəxri fərmanlar və hədiyyələr FHN-in ictimaiyyətlə əlaqə idarəsinin rəis müavini, polkovnik Məhbubə Mustafayeva və beynəlxalq əlaqələr idarəsinin rəis müavini Eldar Əlizadə tərəfindən təqdim edilib.
Xatırladaq ki, hər iki məktəbli Fövqəladə Hallar və Təhsil nazirliklərinin birgə təşkilatçılığı, FHN işçilərinin həmkarlar ittifaqının dəstəyi ilə məktəblilər arasında keçirilmiş “Fövqəladə hallar uşaqların gözü ilə” mövzusunda VIII Respublika uşaq yaradıcılıq müsabiqəsinin də qalibləri olublar.
Bölmənin digər xəbərləri
