Biləcəri sakinlərinin müraciətləri dinlənilib
Bakı, 7 may, AZƏRTAC
Prezident İlham Əliyevin dövlət qurumları rəhbərlərinin əhali ilə görüşlərinin keçirilməsinə dair tapşırığına uyğun olaraq Bakı Şəhər İcra Hakimiyyətinin başçısı Eldar Əzizovun Binəqədi rayonu Biləcəri qəsəbəsinin sakinləri ilə görüşü keçirilib.
Bakı Şəhər İcra Hakimiyyətinin mətbuat xidmətindən AZƏRTAC-a bildirilib ki, qəsəbə sakinlərinin problemlərinin öyrənilməsi və aradan qaldırılması məqsədilə təşkil olunan görüşdə Bakı Şəhər İcra Hakimiyyətinin başçısı ilə yanaşı Binəqədi Rayon İcra Hakimiyyətinin başçısı Elxan Allahverdiyev, Bakı şəhərinin və Binəqədi rayonunun təsərrüfat və digər xidmət sahələrinin rəhbərləri də iştirak ediblər.
Görüşdə çıxış edən Bakı Şəhər İcra Hakimiyyətinin başçısı Eldar Əzizov bildirib ki, Prezident İlham Əliyevin həyata keçirdiyi siyasət nəticəsində bu gün Azərbaycan özünün zəngin və çoxəsrlik tarixi ərzində ən xoşbəxt günlərini yaşayır.
Sonra Binəqədi Rayon İcra Hakimiyyəti başçısının Biləcəri qəsəbəsi üzrə nümayəndəsi Fərdi Ağamalıyev qəsəbədə görülmüş işlərlə bağlı hesabat verib.
“Açıq mikrofon” formatında, dialoq şəklində və sakinlərin fəallığı ilə keçən görüşdə 30-dan çox qəsəbə sakininin çıxış və müraciəti dinlənilib. Sakinlər son vaxtlarda Bakı şəhərində, o cümlədən Biləcəri qəsəbəsində görülən işlərə, onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildiriblər, dövlətimizin başçısının həyata keçirdiyi siyasi kursa birmənalı dəstək ifadə ediblər.
Müraciətlər əsasən fərdi yaşayış evlərinin sənədləşdirilməsi, qəsəbədə su və kanalizasiya xətlərinin yenilənməsi, məhəllədaxili yolların təmiri və işıqlandırılması, qəzalı binaların və dam örtüklərinin təmiri, köhnə liftlərin dəyişdirilməsi, qəsəbədə yeni qəbiristanlıq üçün yer ayrılması, nəqliyyat, məşğulluq məsələləri və s. olub.
Görüş zamanı bəzi məsələlər yerində həll edilib, sakinlərin digər müraciət və təklifləri nəzarətə götürülüb, bu barədə müvafiq tapşırıqlar verilib.
Bölmənin digər xəbərləri
