“BİR HƏSƏDİN TARİXİ” PEKİNDƏ NÜMAYİŞ ETDİRİLMİŞDİR
Bu il noyabrın 22-də respublikamızın ÇXR-dəki səfirliyi tərəfindən tanınmış kinorejissor Vaqif Mustafayevin Azərbaycan Prezidenti Heydər Əliyev haqqında çəkdiyi “Bir həsədin tarixi” adlı sənədli filminə baxış keçirilmişdir. Tədbirdə Türkiyənin Baltikyanı dövlətlərin, Müstəqil Dövlətlər Birliyinə daxil olan ölkələrin ÇXR-də akkreditə olunmuş səfirləri, Çinin Bakıdakı keçmiş səfiri Can Qotcyan və Azərbaycanın Pekindəki səfirliyinin əməkdaşları iştirak etmişlər.
Filmin nümayişindən əvvəl Azərbaycanın ÇXR-dəki səfiri Y.Əliyev çıxış etmiş, bu ekran əsərinin məziyyətlərindən danışmış və müxtəlif beynəlxalq festivallarda qazandığı mükafatlar barədə məlumat vermişdir.
Respublikamızın ÇXR-dəki səfirliyindən AZƏRTAC-a bildirmişlər ki, tədbirin iştirakçıları filmi böyük maraqla qarşılamış, çox yüksək qiymətləndirmiş, Azərbaycan Prezidenti cənab Heydər Əliyevin keçdiyi mənalı ömür yolunun bir hissəsi ilə geniş tamaşaçı kütləsinin daha yaxından tanış olması baxımından bu ekran əsərinin çox mühüm rol oynadığını qeyd etmişlər. Hətta tədbir iştirakçılarının bəziləri “Bir həsədin tarixi”nin məhz Moskvada keçirilən festivalda Qran-Pri mükafatına layiq görülməsi faktının onlarda heyrət doğurduğunu bildirmişlər. Çünki qüdrətli bir dövlət xadimi müdrik siyasətçi olan cənab Heydər Əliyevə ən çox haqsızlıq vaxtilə orada edilmişdir.
Əcnəbi diplomatlar Prezidentimiz haqqında belə bir filmin çəkilməsini kinematoqrafımızın böyük uğuru kimi dəyərləndirmişlər.
Bölmənin digər xəbərləri
