ELM VƏ TƏHSİL
“Bizim söz” qəzeti fəaliyyətini bərpa etmişdir
Bakı, 20 aprel (AZƏRTAC). Ölkənin nüfuzlu nəşrlərindən olan, ziyalılar, yaradıcı adamlar arasında populyarlığı ilə seçilən “Bizim söz” qəzeti yenidən nəşrə başlamışdır.
BDU-nun Mətbuat və informasiya şöbəsindən AZƏRTAC-a bildirmişlər ki, qəzet ilk nömrəsindən başlayaraq Bakı Dövlət Universitetinin Kitabxanaçılıq-İnformasiya fakültəsinin nəzdindəki Tələbələrin Yaradıcılıq Klubunun təşkilatı dəstəyi ilə nəşr ediləcəkdir. Kitabxanaşünaslıq kafedrasının müdiri, professor Abuzər Xələfovun tövsiyələri, fakültənin dekanı dosent Azad Qurbanovun bilavasitə dəstəyi ilə nəşrə başlayan qəzetin bu sayında BDU-nun Kitabşünaslıq və Nəşriyyat işi kafedrasının müdiri, dosent Knyaz Aslanın fakültənin həyatına, xüsusilə son aylar fakültədə aparılan mühüm dəyişiklərə həsr edilmiş analitik məqaləsi “Kitabxanaçılıq-informasiya fakültəsi yeni inkişaf yollarında” başlığı ilə qəzetin əsas (manşet) məqaləsi kimi dərc edilmişdir. Məqalədə ümumən universitetin, eləcə də fakültənin inkişafındakı xidmətlərinə görə BDU-nun rektoru akademik Abel Məhərrəmovun fəaliyyəti yüksək qiymətləndirilmişdir.
Qəzetin yeni nömrəsində professor Elçin Əfəndiyevin “Müasir humanitar təfəkkür” adlı məqaləsi, professor Abuzər Xələfovun, Dünya Gənc Türk Yazarlar Birliyinin başqanı Əkbər Qoşalının, Azərbaycan radiosunun əməkdaşı, şairə Günay Novruzun, Türkel-TV- nin baş direktorunun müavini Hikmət Əsgərovun maraqlı müsahibələri, Fikrət Sadığın, Elnur Bayramın, Əvəz Qurbanlının, Elşən Əzimin şeirləri, Arif Alimin hekayəsi və digər maraqlı yazılar dərc edilmişdir.
Qəzetin baş redaktoru Ələmdar Cabbarlı, məsləhətçisi Knyaz Aslan, redaktoru Nofəl Ədalətdir.
“Bizim söz” bütün tələbələri, gəncləri, yaradıcı insanları əməkdaşlığa dəvət edir. İstənilən mövzuda olan yazılar qəzetin elektron ünvanına ([email protected]) göndərilə bilər.