BMT-DƏ UŞAQLARIN PROBLEMLƏRİ MÜZAKİRƏ EDİLİR
Mayın 8-dən 10-dək BMT Baş Məclisinin xüsusi sessiyası keçiriləcəkdir. Dövlət və hökumət başçılarının, qeyri-hökumət təşkilatları nümayəndələrinin, uşaq və gənclərin hüquqlarının müdafiəçilərinin iştirak etdikləri sessiyada uşaqların vəziyyətini yaxşılaşdırmaq strategiyasının hazırlanması məsələsi müzakirə olunacaqdır.
Nazirlər Kabinetinin mətbuat mərkəzindən AZƏRTAC-ın müxbirinə bildirmişlər ki, sessiyada ölkəmiz baş nazirin müavini Elçin Əfəndiyevin başçılıq etdiyi nümayəndə heyəti ilə təmsil olunacaqdır. O, mayın 9-da sessiyada uşaqların problemləri və bunların həlli sahəsində Azərbaycan dövlətinin gördüyü tədbirləlr haqqında məruzə edəcəkdir.
BMT-nin Azərbaycan ofisi tərəfindən yayılmış məlumata görə, xüsusi sessiyada 1990-cı ildə Uşaqların hüquqları haqqında konvensiyanın və Uşaqların yaşamasının, müdafiəsinin və inkişafının təmin edilməsi haqqında ümumdünya bəyannaməsinin \bu sənəd, demək olar, bütün dövlətlər tərəfindən təsdiqlənmişdir\ qəbul edildiyi vaxtdan bəri əldə olunmuş nəticələrə qiymət veriləcəkdir. Konvensiyanın müddəalarını möhkəmlətmək üçün iki fakultativ protokol - uşaqların silahlı münaqişələrdə iştirakının qadağan edilməsi haqqında və uşaq alveri, uşaq fahişəliyi və uşaq pornoqrafiyası haqqında protokollar da qəbul olunmuşdur.
Gözlənildiyinə görə, sessiyada həm uşaqların yaşaması məsələlərinin, həm də inkişafı problemlərinin gündəliyə daxil olunması barədə dünya liderləri arasında razılıq əldə ediləcəkdir.
Bölmənin digər xəbərləri
