BMT-NİN BAŞ KATİBİ DÜNYA QAÇQINLAR GÜNÜ MÜNASİBƏTİLƏ MÜRACİƏT ETMİŞDİR
AZƏRTAC xəbər verir ki, BMT-nin baş katibi Pan Gi Mun 20 iyun - Dünya Qaçqınlar günü münasibətilə müraciət etmişdir.
Müraciətdə deyilir ki, 1952-ci ildə qəbul edilmiş BMT-nin Qaçqınların Statusu üzrə Konvensiyası qaçqınları vətəndaşı olduğu, doğulduğu, yaşadığı ölkəsindən kənarda olan və irqi, dini, milli, hər hansı bir sosial qrup və ya siyasi cərəyana mənsubiyyətinə görə təqib olunan şəxs kimi müəyyən etmişdir. Əhalinin axını qarşılıqlı amillər əsasında baş verir və insanların tez-tez yerdəyişməsinə maneələr aradan qalxdığına görə məcburi köçkünlərin müdafiəsi getdikcə çətinləşir.
Baş katib vurğulayır ki, keçən il qaçqınların dünyada ümumi sayı 16 milyondan çox olmuşdur. Mən beynəlxalq ictimaiyyəti məcburi köçkünlüyün səbəblərini və bunun nəticələrini aradan qaldırmaq üçün səylərini daha da artırmağa çağırıram. Müdafiənin daha bərabər paylanması üçün beynəlxalq həmrəyliyin artırılması çox vacibdir.
Müraciətin sonunda bildirilir ki, bütün qaçqınların layiq olduğu tam müdafiəni təmin etmək üçün əlimizdən gələni əsirgəməməliyik.
