Britaniya hökuməti deputatların təhlükəsizliyinə 31 milyon funt sterlinq ayırır
London, 28 fevral, AZƏRTAC
Britaniya Daxili İşlər Nazirliyi deputatların təhlükəsizliyini təmin etmək üçün 31 milyon funt sterlinqlik paket elan edib.
AZƏRTAC xəbər verir ki, bu barədə açıqlama verən daxili işlər naziri Ceyms Kleverli polis rəisləri ilə görüşərək deputatların təhlükəsizliyini yaxşılaşdırmaq üçün daha nələrin edilə biləcəyini nəzərdən keçirəcək.
Yardım paketi çərçivəsində görüləcək tədbirlərə ən çox risk altında olan deputatlar üçün şəxsi mühafizəçilər ayrılması daxil olacaq. Maliyyə vəsaiti, həmçinin artan icma gərginliyinə cavab olaraq əlavə polis patrulları üçün istifadə olunacaq.
Daxili işlər naziri deyib ki, heç bir deputat təhdid və ya təqibi işinin bir hissəsi kimi qəbul etməməlidir.
Qeyd edək ki, fevralın əvvəlində Mühafizəkarlar partiyasının deputatı Tobias Elvudun evi Fələstin tərəfdarı etirazçılar tərəfindən hədəfə alınıb. Digər deputat Mayk Frier isə ölüm təhdidləri və seçki dairəsinin ofisinə hücumun artmasından sonra növbəti seçkilərə qatılmayacağını deyib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
