BRÜSSELDƏ AZƏRBAYCAN XALQ CÜMHURİYYƏTİNİN 90 İLLİK YUBİLEYİ QEYD OLUNMUŞDUR
Mərasimdə Belçika dövlətinin rəsmiləri, Avropa İttifaqının və NATO-nun təmsilçiləri, müxtəlif ölkələrin səfirləri, Azərbaycanlı Tələbələrin Avropa Forumunun iştirakçıları, bu ölkədə yaşayan soydaşlarımız və tələbələrimiz iştirak etmişlər.
Səfir Emin Eyyubov tədbiri açaraq qonaqları salamlamış, Azərbaycan Xalq Cümhuriyyətinin Şərq aləmində ilk parlamentli dövlətin əsasını qoyduğunu, qanunun aliliyi və demokratik prinsiplər əsasında qurulduğunu diqqətə çatdırmış, cümhuriyyət qurucularının vətəndaş cəmiyyəti ilə dialoqa xüsusi əhəmiyyət verdiklərini qeyd etmişdir.
E.Eyyubov Azərbaycan Demokratik Respublikasının Avropa modeli əsasında fəaliyyət göstərdiyini bildirmişdir.
Xalq Cümhuriyyətinin tam və müstəqil xarici siyasət həyata keçirdiyini xatırladan səfir yeni yaradılmış respublikanın qonşu dövlətlərlə dostluq əlaqələri qurmağa çalışdığını bildirmişdir.
1991-ci ildə Azərbaycanın öz müstəqilliyini yenidən bərpa etdiyini vurğulayan E.Eyyubov müasir Azərbaycanın tarixi köklərinin məhz ADR-ə əsaslandığını qeyd etmiş, hazırda ölkəmizdə dövlət quruculuğu prosesinin demokratiya, siyasi dialoq, qanunun aliliyi prinsipləri əsasında aparıldığını vurğulamış, bu prinsiplərin ümummilli lider Heydər Əliyev tərəfindən daha da inkişaf etdirildiyini göstərmişdir. Uzaqgörən siyasi xadim və təcrübəli dövlət başçısı Heydər Əliyevin uğurlu siyasəti nəticəsində ölkədə ciddi strateji dəyişikliklərin baş verdiyini, bu gün ölkəmizin iqtisadi inkişafı səviyyəsinin rekord həddə çatdığını xüsusi vurğulayan səfir bir həftə ərzində bir neçə mədəni tədbirin həyata keçirilməsinə dəstək vermiş Heydər Əliyev Fondunun prezidenti, Azərbaycanın birinci xanımı Mehriban Əliyevaya minnətdarlığını bildirmişdir.
Tədbirin sonunda Azərbaycan incəsənət ustaları konsert proqramı ilə çıxış etmişlər.
Bölmənin digər xəbərləri
