İQTİSADİYYAT
“Caspian Energy Club”un üzvləri Türkiyəyə səfər edib
Bakı, 28 oktyabr, AZƏRTAC
“Caspian Energy Club”un sədri və baş icraçı direktoru Telman Əliyevin rəhbərlik etdiyi Azərbaycanın sahibkarlardan ibarət nümayəndə heyəti Türkiyədə biznes-turda iştirak edib.
Bu barədə AZƏRTAC-a “Caspian Energy Club”un sədri və baş icraçı direktoru Telman Əliyev bildirib.
“Caspian Energy Club”un üzvləri SOCAR ın Baş rabitə və hökumətlə əlaqələr üzrə meneceri Mikayil Yusifov, Rəqəmsal rabitə və analitika qrup meneceri Teymur Cahangir və İcra qrupu koordinatoru Nazim İsgəndərov ilə görüşlər keçiriblər.
Telman Əliyev “SOCAR Türkiyə”nin iki qardaş ölkə Azərbaycan-Türkiyə arasındakı iqtisadi əməkdaşlığın ən güclü təmsilçisi olaraq bir tərəfdən məşğulluğa və istehsalata dəstək verməsini yüksək qiymətləndirib. Türkiyədə təsis edildiyi gündən bu yana gördüyü işlərin və gənc komandanın bu yolda verdiyi əməyin ölkəmizin, neft-qaz, neft-kimya və dayanıqlı enerji sahələrində qlobal bazarlara çıxışımızda vacib bir addım olduğunu qeyd edib, klubun Türkiyədəki fəaliyyətində “SOCAR Türkiyə”nin dəstəyinin çox vacib olduğunu bildirib.
Klub üzvlərindən “Vien” qrupun təsisçisi və icraçı direktoru Qabil Mustafayev və Süleyman Məcidli neft-qaz sektorunda uzun illərdir göstərdikləri yüksək xidmətlərlə bağlı məlumat verib, bu sahədəki təcrübənin Türkiyədə aktivləşməsi gözlənilən neft-qaz sektorunda, əsasən də “SOCAR Türkiyə” tərəfindən əməkdaşlığa çevriləcəyinə inandıqlarını qeyd ediblər.
Sıralarında 50 ölkədən 5000-dən çox şirkət və təşkilatı birləşdirən “Caspian Energy Club” 2002-ci ilin iyununda yaradılıb. “Biznes-hökumət” dialoqunun fəal iştirakçısı olan “Caspian Energy Club”un əsas məqsədi Azərbaycanda və “Caspian Energy Club”un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin B2G, B2B və B2C formatlarında dialoqların stimullaşdırılmasından və onlarda fəal iştirak etməkdən ibarətdir. Biznes-netvorkinq üçün beynəlxalq platforma olan “Caspian Energy Club” mütəmadi olaraq müxtəlif tədbirlər təşkil edir. Mənzil-qərargahı Bakıda yerləşən “Caspian Energy Club”un Gürcüstan və Qazaxıstanda rəsmi nümayəndəlikləri, həmçinin dünyanın müxtəlif ölkələrində səlahiyyətli nümayəndələri var.