CƏBRAYIL RAYONUNDAN OLAN MƏCBURİ KÖÇKÜNLƏR PREZİDENT SEÇKİLƏRİNDƏ İLHAM ƏLİYEVƏ SƏS VERƏCƏKLƏR
Bu barədə qərar Biləsuvar rayonundakı çadır düşərgələrində, eləcə də ətraf rayonlarda məskunlaşmış Cəbrayıl rayonundan olan məcburi köçkünlərin iyulun 5-də keçirdikləri yığıncaqda qəbul olunmuşdur. Məcburi köçkün, 80 yaşlı Yusif Əliyev yığıncaq iştirakçılarına məlumat verərək bildirmişdir ki, Cəbrayıl rayonundan olan məcburi köçkünlər müdrik rəhbərimiz, dünya şöhrətli siyasi xadim Heydər Əliyev məktəbinin yetirməsi, onun siyasi kursunun layiqli davamçısı, Avropa Şurası Parlament Assambleyasının sədr müavini və Büro üzvü, Milli Məclisin deputatı, YAP sədrinin birinci müavini, bu gün Azərbaycanın haqq səsinin dünyaya çatdırılmasında əvəzsiz xidmət göstərən İlham Əliyevin prezidentliyə namizədliyini müdafiə edən təşəbbüs qrupunun yaradılmasını təklif etmişlər. Təşəbbüs qrupuna daxil olan 155 nəfər məcburi köçkünün qəti fikri belədir ki, doğma yurd-yuvalarından didərgin düşmüş soydaşlarımızın öz torpaqlarına qayıtmaları üçün Prezident Heydər Əliyevin məqsədyönlü siyasətini dövlətimizin başçısının özü ilə bərabər yalnız İlham Əliyev davam etdirə bilər.Sözünə davam edən ağsaqqal demişdir ki, bu gün möhtərəm Heydər Əliyevin uğurla həyata keçirdiyi neft strategiyasından əldə olunan gəlirlərdən Neft Fondunda yığılan vəsait hesabına məcburi köçkünlər üçün müasir tipli yeni şəhərciklər salınır. Qaçqın və məcburi köçkünlərin həyat şəraitinin yaxşılaşdırılması məqsədi ilə müxtəlif tədbirlər görülür. Bu işlərdə İlham Əliyevin əməyi böyükdür. İlham Əliyevin təşəbbüsü ilə respublikanın ayrı-ayrı bölgələrində Olimpiya Kompleksləri, əlillər, şəhid ailələri və müharibə veteranları üçün yaşayış binaları inşa edilir. Bəzi müxalifət nümayəndələri isə bunu görmək əvəzinə, ağa qara deyib Avropa Şurasına və digər qurumlara yalan məlumatlar göndərirlər. Gənc və qətiyyətli siyasətçi İlham Əliyev isə avropalıların öz dillərində çıxış etməklə Azərbaycanın düşmənlərinə və onların təsiri altına düşənlərə əsl həqiqəti, məsələnin mahiyyətini başa salır. Bu günlərdə Avropa Şurası Parlament Assambleyasının yay sessiyasında Azərbaycanla bağlı məsələnin müzakirəsində İlham Əliyevin ingilis dilindəki çıxışından sonra avropalı deputatların öz fikirlərindən əl çəkərək ölkəmizin mənafeyini müdafiə etmələri buna əyani sübutdur. İlham Əliyevin ABŞ, İngiltərə, Fransa və digər ölkələrin dövlət və hökumət başçıları tərəfindən həmin ölkələrə dəvət olunması və keçirilən görüşlərdə Azərbaycanın neft strategiyası, daxili və xarici siyasəti ətrafında çox dəyərli fikir mübadiləsi aparması onu göstərir ki, İlham Əliyev artıq dünyada qəbul olunan siyasətçidir. Məcburi köçkünlər də bu amilləri əsas götürərək prezident seçkilərində İlham Əliyevin namizədliyini müdafiə edən təşəbbüs qrupunu yaratmışlar. Təşəbbüs qrupunun üzvləri, çadır düşərgəsinin sakinləri İldırım İsmayılov, Səkinə Quliyeva, Gülövşə Hüseynova, Fəxrəddin Rəhimov, Qürbət Şahverənov, Sona Mehdiyeva, Elmira Məmmədova və başqaları tədbirdə çıxış etmişlər. Çıxışlarda qeyd olunmuşdur ki, məcburi köçkünlər möhtərəm Heydər Əliyevin daxili və xarici siyasətini daim müdafiə edirlər. Onlar əmindirlər ki, İlham Əliyev möhtərəm Prezidentimiz Heydər Əliyevin siyasi kursunu davam etdirməyi bacaran siyasətçidir. Yığıncaqda yalnız təşəbbüs qrupunun üzvləri deyil, 500 nəfərə yaxın digər cəbrayıllı məcburi köçkün də iştirak etmiş və onlar da qrupun irəli sürdüyü təklifi ürəkdən bəyəndiklərini, 15 oktyabr prezident seçkilərində yekdilliklə İlham Əliyevə səs verəcəklərini bəyan etmişlər.Tədbirin sonunda Azərbaycan Respublikasının Mərkəzi Seçki Komissiyasına müracət qəbul olunmuşdur. Müraciətdə deyilir ki, seçicilərin təşəbbüs qrupu tərəfindən 2003-cü il oktyabrın 15-də keçiriləcək prezident seçkilərində namizədliyi qeydə alınmış İlham Əliyevi Cəbrayıl rayonundan olan 58 min məcburi köçkün qətiyyətlə müdafiə edir və seçkilərdə ona səs verəcəkdir. Müraciətin Mərkəzi Seçki Komissiyasında nəzərə alınması xahiş edilmişdir.
Bölmənin digər xəbərləri
