CƏNUBİ QAFQAZDA İLK DƏFƏ AVTOMATLAŞDIRILMIŞ BANK SİSTEMİ AZƏRBAYCANDA TƏTBİQ EDİLƏCƏKDİR
“Azərdəmiryolbank” ASC Avtomatlaşdırılmış Bank Sisteminin (ABS) seçimi üzrə qapalı tenderin qalibidir.
Bankın idarə heyəti sədrinin müavini Y.Cabbarov AZƏRTAC-a bildirmişdir ki, artıq yeni sistemin tətbiqi qərara alınmışdır. Bankın tələbatına cavab verən bu sistem onun gələcək inkişafına kömək edəcəkdir.
Cənubi Qafqazda SAP-ın tələblərinə cavab verən ilk bank olmağımız bizim üçün xüsusilə vacibdir. “Sap for Banking”in qərarlarının tətbiqi menecmentin keyfiyyətcə yeni səviyyəyə qalxmasında, səhmdarlar, tərəfdaşlar, müştərilər və ictimaiyyət üçün biznes proseslərinin şəffaflığının artırılmasında mühüm rol oynayacaqdır.
“SAP for Banking” sisteminin bütün modullarına lisenziyaların tam paketinin, o cümlədən müəssisənin qeydiyyatı və idarə olunmasının avtomatlaşdırılması üçün nəzərdə tutulmuş resursların planlaşdırılması üzrə ERP, habelə müştərilərlə qarşılıqlı əlaqələrin idarə olunmasının səmərəliliyini artıracaq CRM (Customer Relationship Management) modullarının alınması üçün müqavilə də imzalanmışdır.
Xatırladaq ki, avtomatlaşdırılmış bank sisteminin seçilməsi üçün bu ilin yanvarında elan olunmuş tenderdə 14 bank proqram təminatı istehsalçısı iştirak etmişdir.
