İDMAN
Çingiz Hüseynzadə: Avropanın bütün idmançıları Beynəlxalq Olimpiya Gününü Azərbaycanda qeyd edirlər
![](/files/galleryphoto/2015/2/1200x630/1435057537150922355_1200x630.jpg)
![](/files/galleryphoto/2015/2/1200x630/14350575376485844256_1200x630.jpg)
![](/files/galleryphoto/2015/2/1200x630/14350575375644842318_1200x630.jpg)
![](/files/galleryphoto/2015/2/1200x630/14350575372343959490_1200x630.jpg)
![](/files/galleryphoto/2015/2/1200x630/14350575375764454988_1200x630.jpg)
![](/files/galleryphoto/2015/2/1200x630/1435057537375114251_1200x630.jpg)
![](/files/galleryphoto/2015/2/1200x630/14350575374452826611_1200x630.jpg)
![](/files/galleryphoto/2015/2/1200x630/14350575374308110739_1200x630.jpg)
Bakı, 23 iyun, AZƏRTAC
İyunun 23-də Milli Olimpiya Komitəsində (MOK) “Bakı-2015” birinci Avropa Oyunlarının sambo yarışlarında gümüş medallar qazanan Azərbaycan idmançıları ilə ənənəvi görüş keçirilib.
AZƏRTAC xəbər verir ki, tədbirdə MOK-un vitse-prezidenti Çingiz Hüseynzadə, Olimpiya çempionları Namiq Abdullayev, Fərid Mansurov, Nazim Hüseynov və idman ictimaiyyətinin nümayəndələri iştirak ediblər.
Məlumat verilib ki, “Bakı-2015” birinci Avropa Oyunlarının 11-ci günündə - iyunun 22-də 13 dəst medalın sahibləri müəyyənləşib. Hesabına 4 gümüş medal əlavə edən Azərbaycan yığmasının aktivindəki medalların sayı 39-a çatıb. Azərbaycan 14 qızıl, 11 gümüş və 14 bürünc medalla komanda hesabında ikinci pillədəki mövqeyini qoruyub.
Yarışların 11-ci günündə Azərbaycana qələbə sevinci yaşadan samboçularımız Nəzakət Xəlilova, İslam Qasımov, Amil Qasımov və Vasif Səfərbəyova MOK-un hədiyyələri təqdim olunub. Sonra samboçularımızın uğurlu çıxışlarını əks etdirən kadrlar nümayiş olunub.
Mərasimdə çıxış edən MOK-un vitse-prezidenti Çingiz Hüseynzadə deyib ki, iyunun 23-ü Beynəlxalq Olimpiya Günü kimi dünyanın bütün ölkələrində geniş qeyd olunur. Azərbaycanda da hər il bu bayram münasibətilə müxtəlif yarışlar təşkil olunur. Bu il Azərbaycanda ilk Avropa Oyunları keçirilməsi Beynəlxalq Olimpiya Gününə böyük töhfədir. “İndi dünyanın diqqəti “Bakı-2015” birinci Avropa Oyunlarına yönəlib. Xüsusi fərəh hissi ilə deməliyəm ki, Avropanın bütün idmançıları Beynəlxalq Olimpiya Gününü məhz Azərbaycanda qeyd edirlər”, - deyə Ç.Hüseynzadə bildirib. O diqqətə çatdırıb ki, sambonun Avropa Oyunlarının proqramına daxil edilməsi MOK-un prezidenti, dövlətimizin başçısı İlham Əliyevin səyi nəticəsində mümkün olub. Sevindirici haldır ki, samboçularımız idmanın bu növündə də medallar qazandılar.
MOK-un vitse-prezidenti deyib: “Cəmi beş gündən sonra ilk Avropa Oyunlarının bağlanış mərasimində iştirak edəcəyik. Tarixdə əbədi qalacaq “Bakı-2015” birinci Avropa Oyunları qəlblərdə uzun müddət yaşayacaq. Əminəm ki, qarşıdakı yarışlarda da idmançılarımız möhtəşəm qələbələri ilə xalqımızı sevindirəcəklər”.